Benedikt Jóhannsson, stærðfræðingur og fyrrverandi fjármálaráðherra, segir mikilvægt að allt sé uppi á borðunum svo ekki fari eins og í hruninu nú þegar ljóst er að von sé á endurskipulagningu hjá íslenskum fyrirtækjum en Benedikt og Drífa Snædal, forseti Alþýðusambands Íslands ræddu um ástandið í efnahags- og atvinnulífinu í Silfrinu í dag.
„Etir hrunið að þá vantaði mikið gegnsæi á mörgum sviðum og var ýmislegt vafasamt gert þá. Ég held að auðvitað eiga menn að horfa á þetta og það er kreppa og þetta kemur illa við marga en við verðum að hugsa okkur heimurinn er breytilegur,“ sagði Benedikt í Silfrinu og bætti við að ekki væri hægt að miða að því að allt verði eins og það var áður en COVID-19 faraldurinn hófst hér á landi. Mörg lítil fyrirtæki hafi verið of veik og því blasi endurskipulagning við.
Drífa tók undir með Benedikt að allt þyrfti að vera upp á borðinu og segir að svo fyrirtæki geti hlotið aðstoð frá stjórnvöldum skipti öllu máli hvernig staðið er að hlutunum. Fjölmörg fyrirtæki hafi nýtt sér hlutabótaleið ríkisstjórnarinnar og sagt upp starfsmönnum en ekki allir hafi þurft á aðstoðinni að halda. „Auðvitað eru fyrirtækin einhvern veginn ekki alveg viss hvað framtíðin ber í skauti sér og hvenær framtíðin kemur,“ sagði Drífa
„Það er náttúrlega algjört skilyrði hjá okkur til að styðja slíka [hlutabótaleiðina], það er að starfsfólk verði ráðið inn samkvæmt starfsaldri, á sömu kjörum, aftur um leið og fyrirtækið hefur rétt úr kútnum,“ sagði hún enn fremur en bætti við að það sé ekki alveg skýrt í lögunum. „Þetta þarf að vera mjög skýrt og það er algjör forsenda fyrir því að við styðjum þetta.“
Þá sagði hún að stuðningur ríkisstjórnarinnar sé ekki hugsað sem styrkur heldur frekar lán þar sem að fyrirtækin þurfi að endurgreiða upphæðina til ríkisins þegar þau hafa náð sér. „Við setjum ansi mörg skilyrði, eðlileg skilyrði, fyrir því að fyrirtækin geti nýtt sér þetta því þetta á ekki að vera bara leið fyrir fyrirtæki til að losa sig við starfsfólk.“