Sjálfstæðisflokkurinn er áfram stærsti flokkur landsins, samkvæmt nýrri skoðanakönnun MMR sem birt var í morgun. Fylgi flokksins mælist nú 21,1% sem er rúmum þremur prósentustigum lægra en við síðustu Alþingiskosningar.
Mesta athygli vekur hins vegar fylgishrun Miðflokksins, mátti flokkurinn ekki við miklu. Fylgi Miðflokksins mældist nú 3,2%, rúmlega tveimur prósentustigum minna en í síðustu kosningum. Þýðir þetta að flokkurinn næði ekki inn manni á þing og myndi þurrkast út.
Hins vegar er Sósíalistaflokkurinn á uppleið. Flokkurinn kom ekki manni að í síðustu kosningum en kæmi manni að ef kosið yrði í dag, miðað við niðurstöður könnunar MMR. Fylgi flokksins er nú 5,5% en var 4,1% í kosningunum í september.
Könnunin var framkvæmd dagana 12. til 18. október og var heildarfjöldi svarenda 967 einstaklingar, 18 ára og eldri.