Matthías Freyr Matthíasson segir fjármálalæsi vera ábótavant í íslenska skólakerfinu en það þekkir hann af eigin reynslu. „Ég hef yfirleitt skammast mín að ræða þessi málefni opinberlega en nú er ég hættur að skammast mín,“ skrifar Matti á Twitter.
„Ég hafði yfirleitt alltaf mjög takmarkaðan skilning á fjármálum og kunni illa með peninga að fara.“ Hann hafi ekki lært neitt um slíka hluti á skólagöngunni. „Ég var yfirleitt í einhverskonar fjármálalegu veseni og í reddingum hingað og þangað, með yfirdrætti hér og þar eða sló fólk um lán hingað og þangað.“
Hlutirnir hafi breyst á tvítugsaldrinum þegar Matta áskotnuðust töluverðir fjármunir. „Síðan líður tíminn og ég bý mér og fjöllunni heimili og á yfirleitt smá aukreitis og litlar skuldir, húsnæði og bíll. Gátum farið erlendis og næserí.“ Síðan hafi hrunið komið og sett stórt strik í reikninginn.
Hætti að svara í símann
„Eftir næstum þriggja ára atvinnuleysi, skilnað og allskonar er ég orðinn Ólafur Ragnar úr Vöktunum. Sífellt að reyna að koma mér út úr veseni með einhverjum reddingum þar sem ,,bankinn var með eitthvað vesen í kerfinu"“
Þar sem tryggja þurfti mat á borðið voru skuldir ekki greiddar og hlóðust upp eins og nýfallinn snjór í desember á Norðurlandi. „Alls staðar kom ég einhvern veginn að lokuðum dyrum. Þannig að ég lokaði augunum fyrir vandamálunum,“ útskýrir Matti sem hætti að svara tölvupóstum og hringingum.
og hringt var í mig, innheimtufyrirtæki var komið að sækja bílinn minn. Í vinnuna. Núna. Þurfti því að fara út og sækja draslið í bílinn og labba með það inn á skrifstofuna og útskýra hvað hefði skeð. Nota bene, skil vel að bílinn hafi verið tekinn, lánin voru ekki greidd
— Matti Matt (@mattimatt) May 2, 2021
Bílinn tekinn í nýju vinnunni
„Lágpunkturinn var þegar ég var tiltölulega nýbyrjaður í nýrri vinnu og hringt var í mig, innheimtufyrirtæki var komið að sækja bílinn minn. Í vinnuna. Núna. Þurfti því að fara út og sækja draslið í bílinn og labba með það inn á skrifstofuna og útskýra hvað hefði skeð.“
Matti kveðst skilja vel að bíllinn hafi verið tekinn þar sem lánin voru ógreidd. „Ég lifði lengi í óttanum. Ég lifði lengi í skömminni yfir því að geta ekki náð tökum á þessum aðstæðum mínum.“
Allar leiðir voru reyndar en ekkert gekk. „Ég var ekki í einhverju fjármálabraski. Bara ósköp venjulegur Íslendingur með ekkert vit á fjármálum sem hafði verið atvinnulaus í lengri tíma.“
Skilar skömminni
Eftir að hafa lifað við þessar aðstæður í mörg ár breyttust aðstæður Matta. „Ég kynnist nýrri konu og við sköpum okkur nýtt líf. Hún kenndi mér margt varðandi peninga sem og aukinn þroski kom. Ég braut odd af oflæti mínu og sýndi vanmátt minn og fór til Umboðsmanns skuldara. Við þá aðgerð snarlöguðust hlutirnir með aðgerðum sem þar var farið í.“
Matti kveðst loks hafa fengið andrými. „Það gerðist allt vegna þess að ég sýndi virkilega loksins vanmátt minn gagnvart aðstæðunum. Ef þú ert á þeim stað að finnast þú ekki komast neitt áfram, þá er það besta sem þú getur gert er að leita aðstoðar. Sama um hvað ræðir.“
Það hafi bjargað geðheilsunni og framtíðarsýninni. „Það eru nokkur ár síðan ég greip til aðgerða en vegna skömm ekki þorað að ræða það.“