Yfirvöld á Spáni lokuðu um helgina rúmlega 50 ströndum vegna þess að of mikill fjöldi fólks kom þar saman. Þar á meðal voru strendur á vinsælum ferðamannastöðum eins og Costa del Sol.
COVID-19 faraldrinum er hvergi nærri lokið og óttuðust yfirvöld að svo stórar samkomur myndu stuðla að frekari útbreiðslu kórónuveirunnar sem veldur COVID-19. Alls var 55 ströndum lokað, að því er segir í frétt blaðsins Sur í Malaga-héraði sem Independent vitnar til.
Víða á Spáni, til dæmis á Benidorm, þurfa strandgestir að bóka tíma á ströndinni til að koma í veg fyrir að of mikill fjöldi fólks safnist saman. Slík kerfi eru þó ekki í gildi alls staðar og því hætta á of fjölmennum samkomum.
Kórónuveirufaldurinn hefur látið að sér kveða í Andalúsíu, á suðurhluta Spánar, að undanförnu en 90 manns sem höfðu tengsl við miðstöð Rauða krossins í Malaga greindust með veiruna í liðinni viku.
Þá fyrirskipuðu yfirvöld í A Marina í Galísíu, sýslu á norðvesturhluta Spánar, útgöngubann vegna skyndilegrar fjölgunar tilfella þar.