English Pub hefur ekki getað opnað fyrir gestum vegna þess að ekki var hægt að skipta starfsmönnum upp á ólík vaktaplön vegna sumarleyfa eftir að COVID-19 smit kom upp hjá starfsmanni á English Pub og Dönsku kránni fyrir helgi.
Eigandi staðanna beggja, Logi Helgason, segir í samtali við Fréttablaðið að það sé mjög súrt að hafa ekki getað haft opið um verslunarmannahelgina en helgin er þeirra helsta tekjulind.
Logi segir að vegna þess að tekjurnar hafi verið það háar aðrar helgar falli hann ekki undir skilyrði tekjufallsstyrkja og því sé aðstoð frá yfirvöldum engin við slíkar aðstæður.
„Þetta er það versta sem maður lendir í, að þurfa að loka fyrirtæki og er mikill skaði fyrir okkur,“ segir Logi í samtali við Fréttablaðið.
Logi segir starfsmenn fara í skimun í dag og að hann vonist til að geta opnað á morgun eftir að niðurstöður koma í ljós. „Ég vonast til þess að færri en fleiri hafi smitast og þá má maður ekki horfa á veltuna á móti,“ segir hann.
