Fjölskylda hins fimm ára gamla Rúnars Berg, sem greindist með hvítblæði fyrir skömmu, segir skjót viðbrögð heilbrigðiskerfisins hafa skipt sköpum og hrósa því í hástert.
Parið Ingibjörg Hulda Jónsdóttir og Gunnar Jarl Gunnarsson tóku eftir því fyrir rúmum tveimur vikum að Rúnar væri ólíkur sjálfum sér og tók Ingibjörg, sem er hjúkrunarfræðingur, blóðprufu af syni sínum. Niðurstöðurnar bentu til þess að hann væri með hvítblæði. Daginn eftir var flogið með drenginn til Reykjavíkur þar sem gerðar voru frekari rannsóknir og næsta dag lágu niðurstöðurnar fyrir og fjölskyldunni greint frá því að hann væri með hvítblæði.
„Við vorum samt mjög stóísk yfir þessu og vorum ekkert að taka þessu sem neinum sannleik þangað til greiningin kemur á þriðjudeginum,“ segir Gunnar í samtali við Fréttablaðið. Daginn eftir að niðurstöðurnar lágu fyrir var Rúnar byrjaður í lyfjameðferð.
Lesa má viðtalið við Gunnar í heild sinni á vef Fréttablaðsins.
„Það er alveg magnað að sjá hvernig þetta ferli fór bara í gang,“ segir Gunnar. „Við erum bara orðlaus yfir stuðningnum bæði félagslega stuðningnum og hvað kerfið grípur mann þétt,“ segir Gunnar.
Þá er einnig verið að safna áheitum fyrir Rúnar Berg í Reykjavíkurmaraþoninu til styrktar Styrktarfélags krabbameinssjúkra barna.
Fjölskylda og vinir hafa opnað styrktarreikning fyrir Rúnar Berg og fjölskylduna. Þeir sem vilja geta styrkt fjölskylduna með því að leggja inn á reikninginn hér að neðan.
Styrktarsjóður Rúnars:
Kennitala: 020892-3749
Reikningsnúmer: 0511-14-011788
Hlaupahópurinn Vinir Rúnars hlaupa til styrktar Styrktarfélags krabbameinssjúkra barna í Reykjavíkurmaraþoninu og hægt er að styrkja það hér.