Tómas Guðbjartsson, hjartaskurðlæknir á Landspítala sem þekktur er sem Lækna-Tómas, er afar ósáttur við framgöngu Þórdísar Kolbrúnar Reykfjörð Gylfadóttur varðandi aðgerðir vegna Covid-19.
Í grein sem hann skrifar og birtist á Vísi með yfirskriftinni „Róm brennur en ráðherra spyr spurninga“ fer hann yfir stöðuna á Landspítala vegna faraldursins sem er afar þung. Hann veltir fyrir sér ummælum ráðherra frá því á föstudaginn.
„Við erum að klára tvö ár af tímabili þar sem við tókum ákveðin borgaraleg réttindi að láni og við ætlum að skila þeim aftur og það er alveg er allt í lagi að spyrja hvenær sá tími er kominn“, sagði Þórdís Kolbrún við RÚV þann daginn.
Hann segist geta fullvissað ráðherra að við séum ekki kominn að þeim tímapunkti og upplifun margra sem starfa á Landspítalanum er að þeir séu í nokkurs konar „rústabjörgun.“ Allir séu orðnir þreyttir á ástandinu en ekkert annað sé í boði en sóttvarnaaðgerðir til að hefta útbreiðslu faraldursins með tilheyrandi áhrifum á heilbrigðiskerfið.
Þurfa að hafa hagsmuni þjóðarinnar að leiðarljósi
„Heldur einhver að það hefði reynst farsælt að láta til dæmis forsvarsmenn ferðaþjónustunnar stýra sóttvarnaraðgerðum hér á landi? Skiljanlega tala þeir fyrir hagsmunum sinnar starfsgreinar en ráðherrar í ríkisstjórn þurfa að sjá heildarmyndina og hafa hagsmuni allra landsmanna að leiðarljósi“, segir Tómas.
„Við munum komast best í gegnum þennan faraldur með samtakamætti og mannúð að leiðarljósi. Þangað til þurfum við úthald og þrautseigju og verðum að byggja ákvarðanir á bestu þekkingu á hegðun veirunnar og stöðu þjóðarsjúkrahússins okkar á hverjum tíma. Að lokum tvennt. Gleymum ekki þeim sem eru alvarlega veikir af öðrum sjúkdómum en COVID og þurfa að geta reitt sig á þjónustu Landspítala, og göngum ekki svo nærri okkar sérhæfða starfsfólki að það velji sér annan starfsvettvang en Landspítala vegna ómannúðlegs álags.“