Kristinn Hrafnsson, ritstjóri Wikileaks, segist oft hafa velt því fyrir sér hvort ekki er hægt að skapa alíslenskan samskiptavettvang í líkingu við Facebook.
Sjálfur segir Kristinn að honum sé bölvanlega illa við þennan vettvang fyrir margra hluta sakir, en bendir jafnframt á að Íslendingar eigi líklega heimsmet í notkun Facebook miðað við höfðatölu.
„Þetta ætti að vera þjóðþrifamál. Það eru t.d. að sópast úr landi milljarðar til Facebook og Google í auglýsingatekjum (m.a. frá opinberum aðilum). Fjölmiðlar líða fyrir þetta og þar með blaðamennska,“ segir Kristinn og bætir við að meirihluti heimsókna inn á íslenska fjölmiðla og íslenskar fréttasíður sé í gegnum glugga þessara erlendu netrisa. Innlenda efnisframleiðslan fái hins vegar engar tekjur.
„Þetta er víða svona og hefur m.a. leitt til hugmynda hjá (hægri) stjórninni í Ástralíu að skikka netrisana til að greiða fjölmiðlum hlutdeild í sínum auglýsingahagnaði,“ segir Kristinn sem bætir við að það væri vel athugandi að ríkið styrkti þetta þróunarverkefni með myndarlegum hætti.
„Auðvitað þarf að huga að ýmsum þáttum svo sem eignarhaldi, gagnasöfnun, auglýsingum eða ekki og öllu því – en útkoman gæti tæpast orðið verri en Facebook. Ég hugsa að fyrir flestum sé komið eins og mér að nota þennan vettvang nær eingöngu fyrir íslensk samskipti en þeir sem vilja halda samskiptum við erlenda félaga geta haldið báðum „bókum“ í gangi.“
Kristinn kallar svo eftir athugasemdum frá vinum og vandamönnum um hugmyndina, sérstaklega þeim sem hafa þekkingu til að meta hversu mikla þróunarvinnu gæti þurft. Hann veltir einnig fyrir sér hvort samtenging við til dæmis Íslendingabók gæti séríslenskan samskiptavettvang meira aðlaðandi fyrir notendur.
Oft hef ég velt vöngum yfir því hvort ekki er hægt að skapa alíslenskan samskiptavettvang í líkingu við facebook. Mér er...
Posted by Kristinn Hrafnsson on Fimmtudagur, 4. júní 2020
