Þjóðminjasafn Íslands tók á dögunum við ýmsum merkilegum gripum frá Ríkisútvarpinu til varðveislu. Þar á meðal eru góðkunningjar landsmanna eins og kötturinn Keli og Klængur sniðugi. Í fréttatilkynningu frá safninu kemur fram að þeir hafi þó verið settir í einangrun í húsnæði safnsins áður en þeim verður fundinn varanlegur staður í safninu.
Að sögn Þjóðminjasafnsins er mikilvægt að gripir úr lífrænum efnum séu settir í einangrun áður en þeim er komið fyrir á sínum stað í safnkostinum. Með því er hægt að koma í veg fyrir að sníkjudýr eins og mölur eða önnur óværa leggist á menningararfinn.
„Þegar RÚV hafði samband brugðumst við að sjálfsögðu við því sá menningararfur sem safnið varðveitir á að endurspegla fjölbreytileika samfélagsins“, segir Ágústa Kristófersdóttir framkvæmdastjóri safneignar Þjóðminjasafnsins.
„Í safni Ríkisútvarpsins eru margir merkilegir gripir eins og gömul útvarpstæki, veðurkortastandurinn og svo eru fleiri góðvinir barna úr fortíðinni eins og Palli og svo eru Glámur og Skrámur á leiðinni“, bætir hún við.
Til að byrja með fara einhverjir hlutir í einangrun og fer hver hlutur í gegnum ákveðið ferli við komuna í safnið. Þar á eftir kemur skráning, varðveisla og að lokum miðlun. Þannig að það er líklegt að landsmenn eigi eftir að hitta einhverja af þessum fornvinum í Þjóðminjasafni Íslands við Suðurgötu 41 í framtíðinni.
