Þeir sem lesa Bændablaðið vita sem er að smáauglýsingarnar á síðum blaðsins eiga það til að vera nokkuð skemmtilegar. Í nýjasta tölublaði Bændablaðsins er ein slík auglýsing sem hefur kætt marga.
„Konugrey á síðustu metrunum óskar eftir því tímabundið að verða matvinnungur í sveit. Er frekar löt en gæti soðið grjónagraut og sett í þvottavél. Ef gífurlegur áhugi er fyrir hendi má senda mér skilaboð á audvitadjajadingdong@gmail.com.“
Auglýsingin er í raun ekki lengri en þetta og gefur „konugreyið“ aðeins upp netfang sem áhugasamir geta sent á. Bent hefur verið á auglýsinguna á samfélagsmiðlum og hefur konunni verið hrósað fyrir hreinskilnina.
Eins og að framan greinir eiga smáauglýsingarnar í Bændablaðinu það til að vera skemmtilegar. DV fjallaði um eina slíka árið 2016 en þá auglýsti bóndinn á Bálkastöðum í Hrútafirði eftir konu til að svæfa sig á kvöldin og vekja sig á morgnana.
Þá fjallaði fréttavefur Eiríks Jónssonar um aðra slíka en þá auglýsti fimmtug kona frá Sviss eftir íslensku ofurmenni að nafni Gísli.
„Gísli, hvar ertu? Ég er að leita að íslenskum ofurmanni sem gengur undir gælunafninu Gísli. Hann er dæmigerður íslenskur, gagnkynhneigður karlmaður, skemmtilegur, kynþokkafullur, einhleypur, hestamaður sem á helst að eiga jörð og hesta. Aldur um 50 ára. Ég er svissnesk, myndarleg, skemmtileg, kynþokkafull hestakona, rúml. fimmtug, móðir tveggja unglinga,“ sagði meðal annars í þeirri auglýsingu.
