Kolbrún Bergþórsdóttir, menningarritstjóri Fréttablaðsins, segir stjórnarandstöðuna geðstirða fyrir að gera athugasemdir við skíðaferð Bjarna Benediktssonar, fjármála- og efnahagsráðherra.
Vill hún að stjórnarandstaðan taki sér málefnalegri mál til umfjöllunar. „Stjórnarandstaðan hlýtur til dæmis að eiga merkilegri erindi við þjóðina en það að skammast þegar vinnufélagi tekur sér frí. Það var þingmönnum stjórnarandstöðunnar til lítils sóma þegar þeir hófu upp öskur um leið og þeir uppgötvuðu að fjármálaráðherra landsins hafði farið utan í skíðaferð í nokkra daga með fjölskyldu sinni,“ segir hún í leiðara blaðsins í dag.
„Talað var eins og fjármálaráðherra hefði brugðist skyldum sínum gagnvart þjóð og þingi með nokkurra daga fjarveru frá vinnustað. Öflugur staðgengill hans var á þingi, þannig að það var ekki eins og ráðherrann hefði skilið allt eftir í reiðuleysi.“
Hún beinir einnig orðum sínum að fjölmiðlum sem hafi gaman af hávaða. „Vitanlega komst stjórnarandstaðan í fréttirnar, eins og hún vonaðist til. Fulltrúar ríkisstjórnarinnar voru látnir svara fyrir frí fjármálaráðherrans og gerðu það flestir glaðir í bragði enda liggur yfirleitt mun betur á þeim en þingmönnum stjórnarandstöðunnar,“ segir Kolbrún.
„Fjármálaráðherrann er víst á leið frá útlöndum eða kannski er hann nýkominn til landsins. Hann á eftir að mæta hinni geðstirðu stjórnarandstöðu og kann þá að velta fyrir sér hvort hann hefði ekki bara átt að framlengja fríið.“