„Þessar fullyrðingar minna óþægilega á ómakleg ummæli frá vissum stjórnmálamönnum í Bandaríkjunum sem hafa verið að úthrópa Kína undanfarið og eðlilega fara menn að velta fyrir sér af hverju þessi ritstjórnargrein var birt.“
Svo segir í yfirlýsingu frá kínverska sendiráðinu á Íslandi sem birt er í Morgunblaðinu í dag. Yfirlýsingin var send út vegna ritstjórnargreinar sem birtist í Morgunblaðinu á dögunum, en yfirskrift greinarinnar var Hið kínverska Tsjernóbyl? Þar var fjallað um kórónuveirufaraldurinn og fullyrt að „leyndarhyggja kommúnistaflokksins“ hefði afhjúpað bresti stjórnarfarsins.
Þá var sagt að viðbrögð kínversku kommúnistastjórnarinnar við upphafi faraldursins hafi minnt á þá tíma þegar Sovétmenn reyndu afneita kjarnorkuslysinu í Tsjernóbyl.
Ryki kastað í augu lesenda
Kínversk yfirvöld eru mjög ósátt við þetta eins og kemur glögglega fram í yfirlýsingunni sem birt er í Morgunblaðinu í dag.
„Kína er ósátt við þessi ummæli og andæfir þeim kröftuglega. Í greininni er CPC sakað um hæg og slæleg viðbrögð við COVID-19- faraldrinum og staðhæft er að faraldurinn vegna COVID-19 hefði sennilega ekki orðið að alheimsfaraldri ef kínversk stjórnvöld hefðu sagt satt og rétt frá,“ segir í greininni en þar er atburðarásin síðustu vikur og mánuði rakin. Þá er vísað í bæði orð Donalds Trump Bandaríkjaforseta og Tedros Ghebreysus, framkvæmdastjóra WHO, sem hrósuðu Kína fyrir viðbrögðin í upphafi faraldursins.
„Ritstjórnargreinin heldur því fram að Kínverski kommúnistaflokkurinn hafi verið að draga fram og dreifa fölskum kenningum um hvernig faraldurinn hafi hafist og gripið til þess að senda erlenda blaðamenn úr landi til að fela ástandið í eigin landi. Þessar ásakanir ganga þvert á staðreyndir og eru eingöngu til þess fallnar að kasta ryki í augu lesenda.“
Ætlast ekki til þakklætis
Þá eru kínversk yfirvöld ósátt við líkinguna við Tsjernóbyl.
„Ritstjórnargreinin ber einnig viðbrögð Kínverska kommúnistaflokksins við faraldrinum saman við viðbrögð Sovétríkjanna sálugu í sambandi við kjarnorkuslysið í Tsjernóbyl og kemur með óábyrg ummæli um kínverska stjórnmálakerfið sem viðra úrelt kaldastríðsviðhorf og hugmyndafræðilega fordóma. Kína er ekki Sovétríkin sálugu, Kínverski kommúnistaflokkurinn er ekki Sovéski kommúnistaflokkurinn.“
Í yfirlýsingunni kemur fram að Kínverjar hafi gripið til umfangsmestu, ströngustu og áhrifaríkustu aðgerða sem völ var á til að berjast við faraldurinn. Líf og heilsa almennings hefði verið sett í fyrsta sæti og árangurinn verið góður.
„Við ætlumst ekki til þakklætis frá alþjóðasamfélaginu en förum einungis fram á að njóta sannmælis. Vírusar virða engin landamæri og eru þeir sameiginlegur óvinur alls mannkyns. Á þessum viðsjárverðu tímum ættum við að hlusta á dr. Tedros Adhanom Ghebreyesys sem sagði að „Núna væri tími fyrir staðreyndir, en ekki ótta. Núna væri tími vísinda en ekki sögusagna, núna væri tími sameiningar en ekki sundrungar.“ Við ættum ekki að eyða tíma í ásakanir, hvorki í fjölmiðlum né í stjórnmálum, heldur ættum við að einbeita okkur að hinni sameiginlegu baráttu við COVID-19 faraldurinn. Við vonum innilega að Morgunblaðinu auðnist að verða víðsýnna, virða staðreyndir og láta af ómaklegum árásum á Kína.“