Kári Stefánsson, forstjóri Íslenskrar erfðagreiningar, vonar að hertum aðgerðum til að hindra útbreiðslu kórónuveirunnar hér á landi ljúki ekki í bráð. Kári viðrar þessa skoðun sína í samtali við Morgunblaðið í dag.
Smitum hefur farið fækkandi eftir að aðgerðir voru hertar í októbermánuði en betur má ef duga skal. Alls greindust 18 innanlandssmit síðasta sólarhring og eru 472 nú í einangrun vegna COVID-19. Þá eru 63 á sjúkrahúsi og þrír á gjörgæslu.
Þórólfur Guðnason sóttvarnalæknir hefur sent minnisblað til Svandísar Svavarsdóttur heilbrigðisráðherra um næstu skref og verður það lagt fram á fundi ríkisstjórnarinnar í dag. Óvíst er hvað kemur fram í minnisblaðinu en Þórólfur hefur sagt að farið veðri hægt í að aflétta þeim takmörkunum sem í gildi eru.
Kári segist vona að hertar aðgerðir verði áfram í gildi, annað væri heimskulegt.
„Það væri ansi heimskulegt á þessu augnabliki að létta á þessum aðgerðum. Eitt af því sem við erum búin að læra á síðustu mánuðum er hversu hratt þetta getur blossað upp. Ég held því fram að við eigum að setja okkur markmið og það markmið sem ég vil setja efst á forgangslista er að sjá til þess að börn geti farið í skóla og verið í skóla á eðlilegan máta.“
