„Hvernig er komið fyrir íslenskri æsku (og það í Vesturbæ Reykjavíkur) sem samkvæmt sjónvarpsfréttum nú á sér þann draum stærstan að reisa hér styttu af einhverjum amerískum poppara,“ segir Jón Viðar Jónsson, einn fremsti leikhúsgagnrýnandi þjóðarinnar.
Jón Viðar vísar til fréttar sem var í kvöldfréttatíma RÚV þess efnis að hátt í sex hundruð manns vilji að reist verði stytta af tónlistarmanninum Kanye West við Sundlaug Vesturbæjar. Um er að ræða hugmynd í hugmyndasamkeppninni Hverfið mitt, en borgin býður Reykvíkingum að koma með hugmyndir um hvernig bæta megi hverfi borgarinnar á hverju ári.
Kanye West þarf ekki að kynna sérstaklega fyrir þeim sem fylgjast vel með tónlist, að minnsta kosti ekki ungu kynslóðinni, en hann hefur um árabil verið einn allra vinsælasti tónlistarmaður heims og er listamaður fram í fingurgóma. Hann er kvæntur Kim Kardashian en á dögunum var greint frá því að hjónin væru að skilja. Hvað sem því líður er Kanye einn sá fremsti á sínu sviði og í uppáhaldi hjá mörgum.
Eiríkur Búi Halldórsson, verkefnastjóri hjá Reykjavíkurborg, sagði í fréttum RÚV að nú tæki við úrvinnslu- og samráðsferli þar sem farið er yfir allar hugmyndir. Hann vill ekki útiloka að styttan verði að veruleika.
„Ég get ekki útilokað það núna en ég get heldur ekki lofað neinu. Það er margt í þessu og við eigum eftir að fara yfir allar hugmyndir,“ sagði hann.
Jón Viðar hristir hausinn yfir þessari hugmynd og segist á Facebook-síðu sinni aldrei hafa heyrt á Kanye West nefndan – og kveðst hann ekki biðjast afsökunar á því. „Og engin líkneskja til af Bubba eða Megasi, nú eða Gunnari Þórðar eða Ragga Bjarna? Hvað hefur farið úrskeiðis í menningarlegu uppeldi unga fólksins? Er þetta ekki toppurinn á óþjóðlegheitunum?“