Jón Viðar Jónsson, einn helsti leikhúsgagnrýnandi þjóðarinnar, segir að hann muni heldur sakna þess að sjá ekki oftar fréttir Stöðvar 2.
Eins og greint var frá í síðustu viku verða fréttir og fréttatengdir þættir á Stöð 2 ekki lengur í opinni dagskrá frá og með morgundeginum. Má segja að með þessu sé blað brotið í íslenskri fjölmiðlasögu enda 34 ár síðan fréttir á Stöð 2 fóru í samkeppni við sjónvarpsfréttatíma RÚV.
Óhætt er að segja að þessi ákvörðun forsvarsmanna Stöðvar 2 hafi vakið athygli og hafa sumir sagt að þetta sé skref í því að loka fréttastofunni. Jón Viðar segist lítið skilja í þessari ákvörðun og hann ætlar ekki að kaupa sér áskrift að Stöð 2 til að geta horft á fréttir.
„Ég mun svona heldur sakna þess að sjá ekki oftar fréttir Stöðvar 2. Og ég skil ekki þá hugsun sem liggur að baki þeirri lokun. Mér hefur skilist að auglýsingatekjur séu ekki nógu miklar, en að þær aukist eitthvað við þetta, því næ ég bara ekki. Hefði haldið að þetta myndi frekar virka öfugt; minnkað áhorf fæla frá auglýsendur. Því hvað sem öðru líður er eitt á hreinu: ég ætla ekki að gerast áskrifandi að Stöð 2, þrátt fyrir þessa breytingu. Svo mikil er ást mín á fréttum stöðvarinnar eða áhugi á dagskrá hennar ekki. Og ég hef grun um að svo sé um fleiri.“