Jón Ingi Hákonarson, bæjarfulltrúi Viðreisnar í Hafnarfirði og harður talsmaður þess að taka upp stóra alþjóðlega mynt, segir eðlilegt að ríkasti hluti þjóðarinnar rói að því öllum árum að viðhalda því kerfi sem er við lýði á Íslandi.
Jón Ingi hefur skrifað nokkuð um íslensku krónuna að undanförnu og í pistli á Vísi í dag heldur hann því áfram.
„Þversögn krónunnar er sú að það er auðvelt að ávaxta hana hratt og örugglega til skamms tíma. Hún er verðtryggð á háum vöxtum í efnahagskerfi sem sveiflast meira en önnur kerfi. Þannig að ef þú átt laust fé, og getur komið þér inn og út úr kerfinu á réttum tíma, er auðvelt að auðgast,“ segir hann.
Hann segir að á móti sé jafn slæmt að skulda í íslenskum krónum þar sem hún er dýr, það endurspeglast meðal annars í háum vöxtum.
„Sveiflurnar stökkbreyta skuldum reglulega og skuldarar hafa ekki færi á að stökkva inn og út úr kerfinu á skuldatímabili sem jafnan er til fjörutíu ára. Fæstir hafa ráðstöfunartekjur til að standa undir eðlilegum lánstíma sem segir okkur að venjulegt íslenskt launafólk hefur ekki efni á þessum gjaldmiðli,“ segir Jón Ingi meðal annars og bætir við:
„Það er því eðlilegt að ríkasti hluti þjóðarinnar rói að því öllum árum að viðhalda þessu kerfi, því gróði hans er ævintýralegur. Allt fjármagnað af mér og þér, hinum íslenska launamanni sem þarf þak yfir höfuðið. Hins vegar er það mér hulin ráðgáta af hverju svo mörgum finnist þetta allt í lagi.“
