Jón Gnarr, fyrrverandi borgarstjóri í Reykjavík, er talsmaður þess að taka upp notkun rafknúinna vöruflutningalesta hér á landi.
Jón segir í færslu á Twitter að slíkar lestir myndu draga stórlega úr þungaflutningum á þjóðveginum sem er löngu sprunginn af álagi, auka umferðaröryggi og draga úr loftmengun. „Og ekki síst tryggja byggð um allt land til framtíðar. Af hverju er ekki verið að ræða þetta?,“ spyr Jón.
Nokkrar umræður hafa skapast undir færslunni og bendir einn á að startkostnaðurinn væri svo hár að það myndi líklega aldrei borga sig. Annar bendir á að það þurfi milljónasamfélag til að halda uppi lestum og teinum.
Þessi hugmynd Jóns er langt því frá ný af nálinni. Hringbraut fann gamla þingsályktunartillögu þriggja þingmanna Framsóknarflokksins frá árinu 1981 um rafknúna járnbraut. „Ýmsir telja, að rafknúin járnbraut sé ódýrasta og afkastamesta flutningatækið, sem unnt sé að fá, þar sem hún hentar,“ sagði meðal annars í tillögunni.
Þá, líkt og nú, virðist kostnaðurinn hafa verið allt of mikll. Hjörleifur Guttormsson, sem gegndi embætti iðnaðarráðherra á þeim tíma þegar tillagan var lögð fram, sagði í þingræðu:
„Sú staðreynd, að flutningar á landi á Íslandi eru tiltölulega litlir og mjög dreifðir, orsakar að hér hentar mjög illa hið hefðbundna rafknúna samgöngukerfi járnbrauta, sporvagna og hálínuvagna, sem er með mikinn stofnkostnað á hvern km. Raunar er flutningsþörfin víðast það lítil að hún stendur ekki fjárhagslega undir gerð varanlegra vega. Erlendis er talið að járnbrautir geti ekki keppt við flutningabifreiðar á skemmri vegalengdum en 200--500 km. Á Íslandi er nú engin járnbraut hugsanleg sem mundi uppfylla þær kröfur um flutningaþörf og vegalengdir sem eðlilegt er að gera.“
rafknúnar vöruflutningalestir myndu draga stórlega úr þungaflutningum á þjóðveginum, sem eru löngu sprungnir af álagi, auka umferðaröryggi, draga úr loftmengun og ekki síst tryggja byggð um allt land til framtíðar. afhverju er ekki verið að ræða þetta?
— Jon Gnarr (@Jon_Gnarr) May 24, 2020