Framundan er einn stærsti dagur ársins hjá fjölmörgum kaupmönnum en á föstudag gengur hinn svokallaði Black Friday í garð sem víða markar upphaf jólaverslunarinnar.
Fjölmargar verslanir bjóða viðskiptavinum sínum upp á afslátt þennan dag en mjög misjafnt er eftir verslunum og vörum hversu hár þessi afsláttur er. Jakob Bjarnar Grétarsson, blaðamaður á Vísi, sendir kaupmönnum skýr skilaboð í færslu sem hann skrifaði á Facebook í dag:
„Orðsending til kátra kaupmanna! Nú er ég að pússa kreditkortið mitt, fer sem fer. En eitt vil ég við ykkur segja sem ætlið að hreykja ykkur á þessu svarta föstudags-hóli. Ég mun líta á 5% afslátt sem móðgun. Ég mun ekki svo mikið sem líta við 10 prósentunum. 15% og 20 fara vel undir radar. Í raun mun ég ekki gefa neinu gaum undir 30% afslætti, þó ekki nema fyrir þau hryðjuverk sem verið er að vinna á íslenskri menningu með þessu kaupæði að hætti Kana. Þannig að, takið nú ykkar gírugu þumalputta úr afturendanum og bjóðið uppá eitthvað sem um munar.“
Breki Karlsson, formaður Neytendasamtakanna, var í viðtali við RÚV í gær þar sem hann hvatti fólk til að sýna varúð í tengslum við tilboðsdaga á borð við svartan föstudag. Tilboðin reynast nefnilega ekki alltaf eins hagstæð og gera má ráð fyrir. Þá séu dæmi um að verslanir hækki verð til þess eins að lækka það á tilboðsdögum, en slíkt er að sjálfsögðu ekki heimilt.