Stjörnublaðamaðurinn Jakob Bjarnar Grétarsson kemur Brynjari Níelssyni til varnar í færslu sem hann birtir á Facebook-síðu sinni.
„Mikið þykir mér þetta einkennileg umræða varðandi Brynjar Níelsson; að ráðning hans sem aðstoðarmanns innanríkisráðherra sé í sjálfu sér einhvers konar bakslag í réttmæta baráttu gegn kynferðisofbeldi,“ skrifar Jakob.
Í síðustu viku var tilkynnt um að Brynjar yrði aðstoðarmaður nýskipaðs innanríkisráðherra, Jóns Gunnarssonar, en ákvörðunin hefur verið harðlega gagnrýnd af ýmsum aðilum. Baráttukonan Sóley Tómasdóttir skrifaði til að mynda á Twitter að það væri hreinlega andfemínískt að setja málaflokk kynferðisbrota í hendur manna á borð við Jóns og Brynjars.
Nei, þetta er komið gott @vinstrigraen. Það er beinlínis andfemínískt að setja málaflokk kynferðisbrota í hendur þessara manna. Önnur eins vanvirðing við þolendur og aktívista er vandfundin. pic.twitter.com/EpIrUyxBJJ
— Sóley Tómasdóttir (@soleytomasar) December 2, 2021
Sitt sýnist þó hverjum og vill blaðamaður Vísis meina að slíkur málaflutningur standist enga skoðun. Að hans sögn er það að „gjalda varhug við aðferðafræði dólgafemínista“ ekki það sama og „stuðningsyfirlýsing við nauðgara og önnur óbermi“.
„Þetta er ekki boðlegur málflutningur, hann stenst enga skoðun það er beinlínis dapurlegt að hann fái vaðið óátölulaust uppi,“ skrifar Jakob.