Ingibjörg Sólrún Gísladóttir, fyrrverandi utanríkisráðherra, er í sóttkví á Fosshóteli á Borgartúni. Í Facebook færslu greinir hún frá þessu og segist jafnframt ætla að hætta sér út á hálan ís og leggur orð í belg vegna umræðu um sóttvarnir á landamærunum.
„Jæja, nú ætla ég að hætta mér út á hálan ís og tjá mig um sóttvarnir á landamærum,“ skrifar Ingibjörg Sólrún. Hún segir upphaflega reglugerðina sem skikkaði alla á sóttkvíarhótel hafa verið fádæma klaufaleg og gerræðisleg.
„Lagagrunnur frelsissviptingarinnar var mjög veikur, ekkert tillit var tekið til aðstæðna fólks, engin útivera leyfð og að auki var þolendum frelsissviptingarinnar gert að greiða 50 þúsund krónur fyrir hana!“ skrifar Ingibjörg.
Hún bendir á að þetta hafi farið öfugt ofan í mjög marga sem eigi heimili hér á landi og töldu sig hafa góðar aðstæður til að fara í sóttkví heima hjá sér.
„Og nú er spurningin þessi: Af hverju má ekki gera greinarmun á ferðamönnum og fólki með heimilisfestu á Íslandi? Allir ferðamenn fari á sóttkvíarhótel og greiði sanngjarnt gjald fyrir það - þeir þurfa hvort eð er að kaupa sér gistingu - en fólk með heimilisfestur á Íslandi geti valdið um að vera í sóttkví heima hjá sér, enda geti það sýnt fram á að það hafi góðar aðstæður til þess, eða fari ella á sóttkvíarhótel sér að kostnaðarlausu.“
Hún segir að þetta gæti líka átt við um fólk sem þurfi að fara í sóttkví meðan rakning á smiti stendur yfir. „Þannig verði litið á sóttkvína sem þjónustu af hálfu yfirvalda og samfélagsábyrgð af hálfu þegnanna en ekki dóm og refsingu. Datt þetta si svona í hug þar sem ég sit í sóttkví við Katrínartún.“