„En nú er ég komin heim, nýt þess að anda að mér fersku Vesturbæjarloftinu og vona að þetta ástand vari ekki lengi,“ segir Ingibjörg Sólrún Gísladóttir, fyrrverandi ráðherra og núverandi forstjóri Lýðræðis- og mannréttindaskrifstofu ÖSE.
Ingibjörg Sólrún greindi frá því í færslu á Facebook í gærkvöldi að hún væri komin heim til Íslands. Aðeins sólarhring áður, eða á föstudagskvöldið, sat hún heima hjá sér í Varsjá í Póllandi þar sem hún rak augun í tilkynningu pólskra yfirvalda þess efnis að til stæði að loka landamærum Póllands frá og með miðnætti í gærkvöldi.
„Á sama tíma kom yfirlýsing frá dönskum stjórnvöldum um að Danmörk myndi lokast frá hádegi. Ég var sem sagt í þann mund að verða innlyksa í Póllandi og engin leið að vita hversu lengi það myndi vara,“ segir Ingibjörg.
Eðli málsins samkvæmt fannst henni þetta vond staða og bendir hún á að eiginmaður hennar, Hjörleifur Sveinbjörnsson, og allt hennar fólk sé á Íslandi. Þá hafi nær allt starfsfólks Lýðræðis- og mannréttindaskrifstofunnar verið komið í fjarvinnu. Íslenska deildin, Ingibjörg og tveir aðrir starfsmenn, hafði því snör handtök og dreif sig af stað.
Þremenningarnir flugu til Kaupmannahafnar með SAS klukkan sex í gærmorgun og þaðan áfram til Íslands. „Ég henti úr ísskápnum, pakkaði niður því nauðsynlegasta og lagði í hann. Mér leið eins og það væri stríðsástand,“ segir Ingibjörg sem er komin heim í Vesturbæinn.
Utanríkisráðuneytið beindi þeim tilmælum til Íslendinga í Póllandi í gær að þeir færu landleiðina til Þýskalands eða annarra nærliggjandi landa ef þeir vildu komast frá landinu. Almenningssamgöngur í Póllandi lögðust af á miðnætti í gærkvöldi sem þýðir að ekki er flogið frá landinu og þá liggja lestarsamgöngur einnig niðri.