„Tveir þrír kófdrukknir menn voru að reyna að stela einhverju úr úrsmíðabúð neðst á Laugavegi. Afgreiðslukonan rak þá út en þá fóru þeir að skemmta sér við að kássast upp á fólk sem var á göngu í Bankastræti. Já, við skulum endilega fara að senda mikið brennivín til fólks.“
Þetta segir rithöfundurinn Illugi Jökulsson á Facebook. Þessi skrif hafa vakið mikla athygli og viðbrögðin hafa verið hörð. Illugi sendir þarna pillu á Áslaugu Örnu Sigurbjörnsdóttur dómsmálaráðherra sem vill gefa íslenskum verslunum tækifæri á að selja áfengi á netinu. Guðrún Sesselja Arnardóttir lögmaður segir að kófdrukknir menn sem séu staddir á Laugaveginum á mánudegi um miðjan dag muni útvega sér áfengi, hvort sem kostur er á heimsendingu eða ekki. Hún segir:
„Finnst líklegra að það sé hófdrykkjufólk sem hefur þolinmæði að bíða eftir áfengi sem það pantar á netinu, sem væntanlega tekur einhvern tíma að senda á áfangastað.“
Þessu svarar Illugi: „Þetta voru ekki útigangsmenn á nokkurn máta. Venjulegir vel klæddir strákar svona 25 ára.“
Friðjón R. Friðjónsson sem á langan feril að baki innan Sjálfstæðisflokksins og einn eigenda almannatengslafyrirtækisins KOM leggur orð í belg og segir:
„Þetta er skrítin dæmisaga. Það eru nánast engar líkur á því þessir menn hafi fengið vínið heimsent. Reyndar eru mestar líkur á því að þeir hafi verið á leið í Vínbúðina Austurstræti. Ef þeir hefðu getað fengið sent heim þá hefðu þeir ekki verið neinum til vandræða.“
Þá tekur Hannes Hólmsteinn Gissurarson, einn af hugmyndafræðingum Sjálfstæðisflokksins til máls. Hann segir innlegg Illuga einn herfilegasta útúrsnúning sem hann hafi séð lengi. Hann segir:
„Rónarnir eiga ekki að koma óorði á brennivínið og nöldurskjóðurnar ekki á frelsið.“
Þá segir Illugi á öðrum stað:
„Furðuleg viðbrögð sem þessi færsla hefur vakið. Er ekki allt í lagi?“