Heilbrigðisráðuneytið hefur ákveðið að leynd ríki yfir gögnum sem liggja til grundvallar ákvörðun stjórnvalda um að skikka fólk frá rauðum og gráum ríkjum í farsóttarhús við komuna til landsins.
Ríkisútvarpið greindi frá þessu í morgun en Óskar Steinn Jónínuson Ómarsson, frambjóðandi Samfylkingarinnar gerir leyndina að umtalsefni í Twitter færslu.
Velferðarnefnd Alþingis fundaði í morgun um þá ákvörðun ráðuneytisins að gögnin væru bundin trúnaði en fundurinn var sérstaklega boðaður í gær þegar það kom í ljós. Halldóra Mogensen, þingmaður Pírata og fulltrúi í nefndinni, segir að skiptar skoðanir hafi verið á leyndinni í nefndinni.
„Við í Velferðarnefnd förum með ríkt eftirlitsshlutverk. Það á ekki að meina okkur að greina frá rökum stjórnvalda fyrir þessari ákvörðun, það takmarkar mjög að hversu miklu leyti við getum sinnt okkar hlutverki,“ segir hún.
„Hvað er í þessum gögnum sem þolir ekki dagsins ljós?“ spyr Óskar Steinn, sem er jafnframt fyrrverandi ritari Samfylkingarinnar. „Mögulega eitthvað sem afhjúpar sundurlyndi ríkisstjórnar í sóttvörnum? Jafnvel gögn sem staðfesta að ríkisstjórnin hafi vitað um og rætt lagalega óvissu um reglugerðina?“ skrifar hann og merkir Svandísi Svavardóttur, heilbrigðisráðherra, sem ekki hefur svarað færslunni.
Hvað er í þessum gögnum sem þolir ekki dagsins ljós? Mögulega eitthvað sem afhjúpar sundurlyndi ríkisstjórnar í sóttvörnum? Jafnvel gögn sem staðfesta að ríkisstjórnin hafi vitað um og rætt lagalega óvissu um reglugerðina? @svasva https://t.co/sWHiG1yC7N
— 🌏🌹 óskar steinn 🌹🌍 (@oskasteinn) April 8, 2021
