„Ármann Kr. Ólafsson, bæjarstjóri Kópavogsbæjar, hyggst ekki gefa kost á sér fyrir Sjálfstæðisflokkinn á næsta kjörtímabili, en kosningar verða árið 2022. Um þetta er nú rætt í herbúðum Sjálfstæðisflokksins, þar sem leitin að mögulegum arftaka er þegar hafin.“
Þannig hefst frásögn sem er að finna undir liðnum Orðið á Götunni á Eyjunni, einni af undirsíðum DV. Þar er gert að því skóna að að Ármann vilji taka sér hvíld frá bæjarpólitíkinni eftir að hafa staðið í ströngu allt frá árinu 1998 er hann var kosinn bæjarfulltrúi þeirra Sjálfstæðismanna. Samkvæmt heimildum Hringbrautar hriktir nú í stoðum meirihlutans og hefur gert síðustu vikur.
Ármann ungur í Sjálfstæðisflokknum
Ármann hefur verið bæjarstjóri frá árinu 2012, fyrst í meirihlutasamstarfi Sjálfstæðisflokks og Framsóknarflokks og Y-lista til ársins 2014, þá með Bjartri framtíð árin 2014-2018 og loks með Framsóknarflokki frá 2018.
Ármann var strax viðloðandi Sjálfstæðisflokkinn á sínum yngri árum, en hann sat bæði í stjórn og framkvæmdastjórn Ungra Sjálfstæðismanna. Einnig var hann aðstoðarmaður Halldórs Blöndal í samgönguráðuneytinu á árunum 1995 til 1999 en færði sig í kjölfarið yfir til sjávarútvegsráðuneytisins þar sem hann var Árna M. Mathiesen til halds og trausts til ársins 2005 og fylgdi honum yfir í fjármálaráðuneytið. Ármann sat einnig á þingi fyrir Sjálfstæðisflokkinn á hrunárunum 2007 til 2009.
Á Eyjunni er vitnað í ævisögu Gunnars Birgissonar, fyrrverandi bæjarstjóra í Kópavogi, þar sem hann tjáði sig um kynni sín af Ármanni. Á Eyjunni segir:
„Fyrst hafi allt gengið vel, en síðan hafi borið skugga á sambandið vegna trúnaðarbrests og svo vinslit fylgt í kjölfar prófkjörs Sjálfstæðismanna 2010, sem Ármann vann og Gunnar varð þriðji. Segir Gunnar aldrei fyrirgefa Ármanni trúnaðarbrestinn.
Gunnar segir að Ármann tilheyri ákveðinni klíku innan Sjálfstæðisflokksins, sem hann kallar gangsterana, sem stjórnað er af Guðlaugi Þór Þórðarsyni, utanríkisráðherra. Það sé ekkert leyndarmál að markmið klíkunnar sé að taka yfir Sjálfstæðisflokkinn:
„Þetta eru miskunnarlausir menn og það yrði skelfilegt fyrir Sjálfstæðisflokkinn næðu þeir að taka hann yfir. Koma þarf í veg fyrir það með öllum tiltækum ráðum. Vinnubrögðin minna einna helst á Óskarsverðlaunamyndina frægu, Guðföðurinn. Gulli er Don Corleone og hinir verða að sverja honum hollustu sína.“
Gunnari Birgissyni fannst framkoman í sinn garð eftir prófkjörið 2010, vera fyrir neðan allar hellur. Taldi Gunnar að það mætti allt rekja til þess að hann hefði ákveðið að styðja Björn Bjarnason í prófkjöri fyrir borgarstjórnarkosningar 2003. Gunnar heldur fram að Guðlaugur Þór hafi ákveðið að hefna fyrir þetta. Á Eyjunni segir:
„Gunnar segir einnig að Gulli „sjái um sína,“ og hafi ráðið vini sína og já-bræður í alls kyns verkefni í tíð sinni sem heilbrigðisráðherra. Þá tekur hann fram að fylgjast þurfi með Guðlaugi nú þegar hann sé aftur orðinn ráðherra.“
Á Eyjunni er því velt upp hvort að Ármann endi nú í utanríkisráðuneytinu hjá Guðlaugi Þór Þórðarsyni utanríkisráðherra. Samkvæmt heimildum Hringbrautar er það rétt sem fram kemur á Eyjunni að vitað er að mikill ágreiningur hefur átt sér stað innan meirihlutans síðustu vikur. Þann ágreining má rekja allt aftur til síðustu kosninga er Ármann myndaði með óbragð í munni stjórn með Framsóknarflokknum, svo nú hriktir í stoðum meirihlutans. En fjallað verður ítarlega um átökin í Kópavogi á Hringbraut síðar í vikunni.
