„Helsta heilsuváin á Íslandi þessa dagana eru gamlir karlar sem virða ekki tveggja metra regluna og troða sér á milli fólks sem virðir hana, hóstandi og ræskjandi sig. Spurning með að setja útgöngubann á þennan hóp?“
Þetta segir Ólafur Arnarsson fyrrverandi formaður Neytendasamtakanna. Hann heldur því fram að sá hópur í þjóðfélaginu sem oftast brjóti regluna um að halda tveggja metra fjarlægð til að koma í veg fyrir að smitast af COVID-19 séu eldri karlmenn. Ólafur lét þessi orð falla á Facebook-síðu sinni. Fjölmargir tjá sig undir innleggi Ólafs og taka undir með honum.
Helga Vala Helgadóttir, þingmaður Samfylkingarinnar, segir að á Alþingi séu einstaklingar sem fari ekki eftir reglunum sem sóttvarnarlæknir hafi sett.
„Magnað - við vorum einmitt að ræða þetta á vinnustaðnum mínum. Þar eru einstaklingar sem bara geta alls ekki farið eftir þessum einföldu reglum. Bara alls ekki. Það er eiginlega skerí.“
Gunnar nokkur Bjarnason spyr hvort ekki sé um að ræða flökkusögu.
„Ég held að margir gamlir karlar séu í sjálfskipaðri sóttkví. Ég frábið mér þennan “rasisma”.“
Er Gunnari svarað af fjölmörgum Íslendingum að eldri karlmenn séu sá hópur sem langoftast brjóti tveggja metra regluna.
„Þetta eru þeir einu sem ég sé brjóta þetta hér fyrir norðan á Húsavík,“ segir Alva Kristín sem búsett er fyrir norðan. Þá segir Guðrún Þóra Hjaltadóttir:
„Ég hef tvisvar lent í því að akkúrat svona karlar hafa farið fyrir framan mig í röðinni.“ Hólmfríður Kristín Hilmisdóttir kveðst svo hafa lent í „einum svona“ karli í Rúmfatalagernum. Þá segir Ingimar Ragnarsson:
„Fer lítið í búðir þessa dagana, en fór í Krónuna í gær og Hagkaup. Ég sá nokkur tilvik þar sem fólk sýndi skeytingar- eða skilningsleysi og það var eldra fólk en af báðum kynjum.“