75 einstaklingar greindust með Covid-19 veiruna síðastliðinn sólarhring. Svo mörg smit hafa ekki greinst hér á landi síðan 1. apríl síðastliðinn þegar greindust 99 smit. Helmingur þeirra sem greindust voru í sóttkví.
Víðir Reynisson, yfirlögregluþjónn hjá ríkislögreglustjóra sagði á upplýsingafundi almannavarna í dag að höfuðborgarsvæðið væri nú á efsta stigi viðvörunarkerfisins almannavarna, vegna hraðrar útbreiðslu Covid-19 á svæðinu. Aðeins þrjú smit sem greindust í gær voru utan höfuðborgarsvæðisins.
Víður og Þórólfur Guðnason, sóttvarnalæknir segja að ekki sé lengur hægt að tala um fordæmalausa tíma. Þeir minntu ítrekað á mikilvægi persónubundinna sóttvarna á fundinum í dag og mikilvægi handþvottar og sprittnotkunar. Þá hvöttu þeir fólk til þess að vera jákvætt og bjartsýnt og sagði Víðir að veiran væri óvinurinn og því ætti fólk ekki að leita að sökudólgum hvað hjá öðru.
„Við höfum oft talað í þessum faraldri um fordæmalausa tíma en við erum kannski ekki lengur þar. Við erum búin að upplifa margt af þessu áður og við vitum alveg hvað við þurfum að gera,“ sagði Víðir á fundinum í dag .