„Hjartað mitt brotnaði í 1000 mola í dag í sundklefanum þegar ég heyrði tvær 11 ára stelpur ræða sín á milli hvernig þær myndu sko breyta öllu við sig með aðgerðum ef þær gætu,“ segir ung kona, Helga að nafni, í Twitter-færslu sem vakið hefur mikla athygli.
Helga bætir við: „Getum við plís frætt unglingana okkar um óraunhæfar staðalímyndir og mikilvægi sterkrar sjálfsmyndar.“
Margir hafa deilt færslunni og þá taka margir undir með henni í athugasemdum undir.
„Sá síðast fyrir 3 mínútum auglýsingu í sjónvarpinu um þátt sem verður um manneskju sem er á leið í aðgerð til að breyta útlitinu. Vissulega magaermi, en samt í sjónvarpi á prime time eins og ekkert sé eðlilegra en að demba sér í aðgerð. Svo eru insta-stjörnurnar ekki að hjálpa,“ segir ein.
Þetta er ekki eina færslan hér á landi um svipað málefni sem vakið hefur athygli hér á landi síðastliðinn sólarhring. Ein kona lýsti samtali ungra vinkvenna í sundlaug í Hafnarfirði í einni tiltekinni hverfisgrúppu í gærkvöldi.
,,Mömmu er farið að gruna að ég sé ekki að borða” .. heyrði ég eina 13/14ára segja við vinkonur sínar tvær,“ sagði konan sem lýsti samtalinu frekar. „Önnur vinkonan ansaði ,,ég er ekkert að svelta mig ég er bara oft ekki svöng” og sú þriðja (tággrönn) sagðist ætla samt kannski að fá sér hádegismat á morgun ef það væri vegan í boði.“
Konan bætti við að nauðsynlegt sé að fræða börn um næringu og besta leiðin til að grennast sé að borða oft, borða hollt, borða í hófi og stunda hreyfingu.
Vert er að vekja athygli á vef Samtaka um líkamsvirðingu en á vefnum kemur fram að slæm líkamsímynd sé nokkuð algeng meðal ungs fólks, sérstaklega kvenna. „Rannsóknir sýna að þær fyrirmyndir sem börn og unglingar hafa t.d úr teiknimyndum, tónlistarmyndböndum og Instagram geta haft mikil áhrif á þróun líkamsmyndar og líðan,“ segir á vefnum sem hægt er að kynna sér frekar hér.