Tyrkneski hakkarinn sem stendur að baki árásum á íslenska áhrifavalda segir að einn íslenski áhrifavaldurinn hafi borgað sér fyrir að loka reikningunum.
Hakkarinn er í viðtali við Fréttablaðið um málið.
Hakkarinn, sem segist heita Mellissa og vera 19 ára kona í Istanbúl, segir að hún hafi verið beðin af áhrifavaldinum íslenska að gera árásirnar. Sá áhrifavaldur hafi sjálfur beðið um að verða fórnarlamb til að koma í veg fyrir að einhver gruni sig.
Meðal fórnarlamba hakkarans hingað til eru Birgitta Líf Björnsdóttir, áhrifavaldur og eigandi Bankastrætis Club, Kristín Pétursdóttir, áhrifavaldur og leikkona, Edda Falak, áhrifavaldur og crossfit þjálfari, Dóra Júlía, plötusnúður og útvarpskona ásamt fjölmörgum öðrum Instagram-stjörnum.
Nú síðast hótaði hún síðan Jóni Jónssyni tónlistarmanni og samfélagsmiðlastjörnunni Binna Löve.
„Ég er bara að sinna vinnunni minni. Fólk finnur mig og gefur mér nöfn og reikninga sem þau vilja að ég loki. Þegar ég hef fengið greiðsluna mína vinn ég bara vinnuna mína. Mér er alveg sama hvaða reikningar þetta eru,“ segir Mellissa. „Einn af áhrifavöldunum er að borga mér og til þess að forðast það að liggja undir grun vildi sá áhrifavaldur að ég myndi loka reikningnum sínum líka.“