Heimir Jónasson er látinn. Hann féll frá í dag 53 ára að aldri. Í janúar árið 2018 greindist Heimir með taugahrörnunarsjúkdóminn Corticobasal Degeneration (CBGD).
Heimir var vinsæll, vinamargur og átti farsælan feril í atvinnulífinu. Hann lærði framleiðslu í Kvikmyndaháskólanum í München og starfaði sem kvikmyndaframleiðandi og ráðgjafi í auglýsinga- og markaðsmálum, meðal annars hjá Íslensku auglýsingastofunni.
Þá var hann fyrrverandi dagskrárstjóri og forstöðumaður Stöðvar 2 og var verkefnisstjóri sératburða í markaðsdeild Icelandair. Hann var einnig framkvæmdastjóri Markaðsstofu Kópavogs og lauk MBA-námi í vor. Hann starfaði einnig sem þjálfari hjá Dale Carnegie.
Heimir Jónasson greindist með sjaldgæfan sjúkdóm í janúar árið 2017. Parkinson plús er alvarlegt afbrigði af Parkinson og er ólæknandi taugasjúkdómur sem veldur ýmiss konar hreyfihömlun.
Heimir sagði í viðtali við Fréttablaðið fyrir tveimur árum: „Ég byrjaði að finna fyrir máttleysi í maí í fyrra. Ég byrjaði daginn á hlaupi hérna í nágrenninu en ég var að byrja að undirbúa mig fyrir Reykjavíkurmaraþonið sem ég hef iðulega tekið þátt í, bæði hlaupið 10 km og hálfmaraþon,“ sagði Heimir, sem var mikill hlaupagarpur. „Ég gat hins vegar ekki hlaupið nema um 3-400 metra og þurfti svo að ganga restina af einum kílómetra.“
Heimir var farsæll í flestu sem hann tók sér fyrir hendur. Berglind Magnúsdóttir, eftirlifandi eiginkona Heimis greindi frá andláti hans í dag. Berglind skrifaði:
„Elsku vinir. Það er með sorg í hjarta sem ég segi ykkur að Heimir minn kvaddi okkur í hádeginu í dag. Andlátið var friðsælt, við héldumst í hendur og þó þetta sé erfiðari stund en hægt er að ímynda sér, vitið þið flest að hann var hvíldinni feginn. Takk fyrir aðstoðina, hugulsemina og hlýjar kveðjur sem við höfum fengið. Við fjölskyldan stöndum þétt saman á þessari sorgarstund og vitum að Heimir er með okkur í anda, frjálsari nú en hann hefur verið um langa hríð, hans dásamlegi hlátur og mikla lífsgleði og manngæska er það við munum um alla framtíð.“
Fjölmargir minnast Heimis á samfélagsmiðlum. Einn af þeim er vinur Heimis, fyrrverandi fréttastjóri Stöðvar 2 og ritstjóri, Steingrímur Sævarr Ólafsson. Hann segir:
„Sorg í hjarta, erfitt, tárin renna. Heimir Jónasson vinur minn kvaddi okkur í hádeginu og er horfinn til austursins eilífa eftir snarpa baráttu við illvígan sjúkdóm, en ég veit að hann er frelsinu feginn. Heimir var vinur vina sinna, með stórt hjarta, einhver fyndnasti maður sem ég þekkti og sá alltaf björtu hliðarnar á öllum málum.
Það er tóm í hjartanu, verkur mikill, nú þegar hann er farinn en minningin um fallegan dreng lifir með okkur.
Farðu í friði elsku vinur og innilegustu samúðarkveðjur og hlýjustu hugsanir til Berglindar og barnanna þriggja.“
Hringbraut sendir öllum vinum Heimis samúðarkveðjur.