Hannes Hólmsteinn Gissurarson stjórnmálafræðingur vill að samið verði um vopnahlé í Úkraínustríðinu og hvetur fólk til að stjórnast ekki af Rússahatri.
Hann segist þó ekki vera á sömu línu og Ólafur Ragnar Grímsson, fyrrverandi forseti Íslands, sem sé í veisluglaumnum í Kreml-kastala. Hannes segist standa með rússneskri alþýðu á Rauða torginu.
„En áður en ég segi ég við hvernig það verður þá vil ég taka það sérstaklega fram að ég er stuðningsmaður Úkraínu. Það er enginn vafi í mínum huga að hinir seku aðilar eru Rússar. Þeir réðust inn í Úkraínu og þeir hafa framið margvísleg voðaverk, eins og oft er gert í stríðum og Úkraínumenn hafa unnið áróðursstríðið. En hvernig endar þetta? Þetta getur bara endað á einn hátt ef menn eru ekki algerlega heillum horfnir, með því að það verði samið um vopnahlé, síðan verði atkvæðagreiðslur í hinum umdeildu héruðum í austurhluta Úkraínu um hvort íbúarnir þar vilja frekar tilheyra Úkraínu eða Rússlandi. Það er ekki okkar að ákveða fyrir aðra hverjum þeir eiga að tilheyra,“ segir Hannes í samtalivið Vísi.
Hannes vill að Úkraína sé boðin velkomin í vestrið og verið aðili að Evrópska efnahagssvæðinu.
Málflutningur Ólafs Ragnars í Silfrinu féll í grýttan jarðveg þar sem hann kenndi stækkun NATO um að hafa valdið stríðinu.
„Ég held að munurinn á Ólafi Ragnari og mér sé að hann situr í veisluglaumnum inni í Kreml-kastala, en ég er úti á Rauða torginu með fólkinu. Það er að segja: Hjarta mitt slær með rússnesku þjóðinni, ekki með rússnesku valdhöfunum. Það sem ég vil gera í framtíðinni er að vera í góðum viðskiptum við rússnesku þjóðina og ég vona svo sannarlega að Pútín hrökklist frá völdum og við taki lýðræðislega kjörnir valdhafar sem færa Rússland aftur í átt til vesturs. Opna glugga, smíði brýr. Ég vil ekki reisa múra, heldur smíða brýr,“ segir Hannes.
Hægt er að horfa á viðtalið við Hannes á Vísi hér.