Hannes Hólmsteinn segir Íslendinga hafa kosið stöðugleika í nýliðnum Alþingiskosningum. Þetta kemur fram í nýjum pistli Hannesar á vef Conservative en hann ræðir úrslitin líka á Facebook síðu sinni.
„Hér reyni ég að skýra og greina úrslitin í kosningunum. Það er auðvitað ekki að furða, að þeir á RÚV kalla aldrei á mig til að ræða um stjórnmál: Þeir geta ekki treyst því, að röddin sé bergmál,“ skrifar Hannes á Facebook þar sem hann kynnir pistil sinn til sögunnar.
Leggur Hannes þar meðal annars til að Sigmundur Davíð og tveir félagar hans í Miðflokknum gangi til liðs við Sjálfstæðisflokkinn. Hann segir Samfylkinguna hafa tapað vegna bónusa Kristrúnar Frostadóttur sem hún hlaut sem aðalhagfræðingur Kviku banka.
Þá hnýtir Hannes í Gunnar Smára Egilsson, formann Sósíalista. Hann lýsir Gunnari Smára sem fyrrverandi blaðamanni sem gefið hafi út æsifréttablöð og tímarit sem öll hafi farið á hausinn.
Hannes segir Gunnar Smára hafa verið á ofurlaunum, eignast góðar eignir og svo platað Jón Ásgeir í útgáfuævintýri í Danmörku. Hann segir Gunnar Smára ekki hafa hætt þar, heldur haldið áfram og gengið í Samtök múslíma á Íslandi og að berjast fyrir því að Ísland gengi í Noreg.
Í kosningabaráttunni hafi Gunnar Smári svo breyst í Lenínista, og hótandi að reka dómara.
Atkvæði til Framsóknar til ríkisstjórnarinnar
„Tvær kenningar mínar um kosningaúrslitin, sem ég sé ekki haldið á lofti annars staðar: 1) Atkvæði greidd Framsóknarflokknum voru að miklu leyti atkvæði greidd stjórnarflokkunum almennt. Skoðanakannanir sýndu meira fylgi við stjórnina almennt en við stjórnarflokkana hvern um sig, og þeir stuðningsmenn stjórnarinnar, sem áttu erfitt með að ákveða sig, leystu þann vanda með því að krossa við Framsóknarflokkinn,“ skrifar Hannes.
„2) Sósíalistaflokkurinn hirti það fylgi, sem Samfylkingin hafði gert sér vonir um að fá frá Vinstri grænum með því að færa sig til vinstri við þá, en hann kom jafnframt í veg fyrir, að það skilaði sér í þingsætum. Gunnar Smári kostaði Samfylkinguna nú ekki minna með framboði sínu en Baug forðum með ævintýrunum erlendis.
Það hefur síðan margoft komið fram hjá öðrum, að lítill áhugi reyndist vera á að rústa kvótakerfinu, samþykkja drögin frá hinu ólöglega kjörna Stjórnlagaráði (sem Feneyjanefndin varaði sérstaklega við) og ganga í Evrópusambandið. Þau mál virðast ekki vera á dagskrá og því síður „ójöfnuður“ (vildarorð um ójafna tekjudreifingu), en í auglýsingu frá Háskóla Íslands um fund viku fyrir kosningar var „ójöfnuði“ lýst sem einni helstu ógn 21. aldar. (Fundarboðendur höfðu væntanlega ekki frétt af hryðjuverkunum 2001, fjármálakreppunni 2007–2009, heimsfaraldrinum 2019–2021, aðförinni að málfrelsi í háskólum og á fjölmiðlum, framgangi öfgamúslima í Afganistan og víðar, undirokun Tíbets og Hong Kong og herferð gegn þjóðabrotum í austurhluta Kína, jafnframt því sem kínverski kommúnistaflokkurinn hefur hafið kalt stríð gegn Vesturlöndum.)“