Halla Gunnarsdóttir hefur sagt starfi sínu lausu sem framkvæmdastjóri ASÍ. Hún greinir sjálf frá þessu í færslu á Facebook. Halla er í fæðingarorlofi og segir að hún muni ekki snúa aftur til starfa að fæðingarorlofi loknu.
„Ég hef tekið þá ákvörðun að snúa ekki til baka til starfa sem framkvæmdastjóri ASÍ að loknu fæðingarorlofi. Það er ekkert leyndarmál að ég kom til starfa hjá ASÍ til að vinna með Drífu Snædal. Ég tel bæði rétt og eðlilegt að nýr forseti fái til sín framkvæmdastjóra sem hann treystir og á trúnað hjá. Á næstu vikum mun ég skila af mér og vera nýjum forseta og framkvæmdastjóra innan handar eftir þörfum, en síðan skilja leiðir,“ skrifar Halla á Facebook.
„Ég er stolt af þeim verkefnum sem ég hef komið að hjá ASÍ. Ég lagðist á árarnar með Drífu að vinna að þeim málum sem hún hafði sett á oddinn, sem lutu m.a. að baráttu gegn misskiptingu og ójöfnuði og glæpastarfsemi á vinnumarkaði, sem og baráttu fyrir húsnæði á viðráðanlegum kjörum. Við fengum eina covid-kreppu í fangið sem kallaði á kröftug viðbrögð verkalýðshreyfingarinnar. Við sóttum í þekkingu um allan heim til að standa fast gegn niðurskurðarhnífnum sem margir vildu hefja á loft þegar í stað. (Nú er búið að brýna hann að nýju, en það er efni í annan pistil). Við byggðum upp frekari sérfræðiþekkingu innan skrifstofunnar til að mæta áróðri sérhagsmunaaflanna sem vilja sífellt skara eld að eigin köku á kostnað okkar hinna. Við jukum við getuna til að koma okkar skilaboðum á framfæri með markvissum og hnitmiðuðum hætti. Til marks um það var ASÍ næstum því tvöfalt oftar í fréttum en SA á síðasta ári,“ heldur Halla áfram.
Hún segir að það hefur verið skemmtilegt og lærdómsríkt að starfa með þeim sterka og öfluga starfsmannahópi sem starfar innan ASÍ.
„Ég hef farið fyrir og átt þátt í að byggja upp. Sama má segja um bæði forystufólk og starfsfólk aðildarfélaga ASÍ, innan félaganna er gríðarleg reynsla og þekking sem ég hef fengið að njóta góðs af. ASÍ getur ekki verið öflugra en aðildarfélögin vilja hverju sinni,“ skrifar Halla.
„Síðustu ár hafa einkennst af hatrammri valdabaráttu og niðurrifi, eins og komið hefur fram opinberlega. Vinnuskilyrðin hafa oft verið óbærileg. Starfsfólk ASÍ, þar á meðal ég, hefur verið dregið inn í opinbera umræðu þar sem það á erfitt með að svara fyrir sig. Að mínu mati hefur þetta dregið þrótt úr hreyfingunni, sem kemur niður á launafólki og almenningi á Íslandi.
Ég vona að á komandi þingi ASÍ takist að leysa einhverja af þeim hnútum sem hafa verið hnýttir á síðustu misserum og komast að minnsta kosti að samkomulagi um hvernig sambandið á að halda á spilunum þennan vetur kjaraviðræðna. Launafólk á Íslandi á verkalýðshreyfinguna og það er okkar allra að standa vörð um sameinaða og öfluga verkalýðshreyfingu á Íslandi. Við eigum mikið undir henni.Ég óska formönnum aðildarfélaga ASÍ, stjórnum þeirra og starfsfólki, kjörnum fulltrúum og skrifstofu ASÍ alls góðs og þakka fyrir mig að sinni,“ skrifar Halla að lokum.