„Mér finnst gott hjá fjölskyldunni að fara í felur. Ömurlegt að hún hafi þurft þess,“ segir Guðmundur Steingrímsson, fyrrverandi þingmaður, í pistli í Fréttablaðinu í dag.
Þar fjallar hann um mál egypsku Kehdr-fjölskyldunnar sem fór í felur í fyrradag, sama dag og stóð til að framfylgja brottvísun hennar úr landi.
Guðmundur sat á þingi frá 2009 til 2016 og kveðst hann hafa lesið lögin um útlendinga, flóttafólk, hælisleitendur og það sem að málefnum þeirra lýtur.
„Ég man ekki eftir því að þar væri að finna þá hugsun, að þegar flóttafjölskylda kæmi hingað til lands væri best að leyfa fjölskyldunni að aðlagast vel samfélaginu, börnum að fara í skóla, eignast vini og læra íslensku í dágóðan tíma, og svo þvinga þau burt með valdi að næturlagi aftur til landsins sem þau flúðu frá upphaflega, þar sem lífi þeirra er ógnað. Ég er pottþéttur á því að lögin eru ekki svona. Enda væru það þá heldur betur fáránleg og ómanneskjuleg lög. Beinlínis andstyggileg,“ segir Guðmundur sem bætir við að samt sé þetta gert svona, aftur og aftur.
„Það er eins og einhvers konar kerfislægt ónæmiskerfi líti á flóttafólk eins og Kehdr-fjölskylduna sem veirur, svo notað sé líkingamál í anda okkar tíma, og fátt annað komist að en að koma þeim út úr þjóðarlíkamanum,“ segir Guðmundur sem veltir fyrir sér hvaða fólk það var sem ákvað þetta.
„Er einhver manneskja til sem getur útskýrt fyrir okkur hinum hvar þessi tiltekna stefna, þessar aðferðir, voru búnar til og hvaða pólitíski vilji býr að baki? Hver er hugsunin? Ég man ekki eftir þessari ræðu í sölum Alþingis. Um skaðsemi flóttafólks. Um hættuna sem okkur stafar af börnum í neyð. Um hina djúpu og aðkallandi nauðsyn þess að þvinga börn úr landi, jafnvel eftir að þau hafa gengið hér í skóla, lært íslensku og eignast vini. Hefur þessi ræða verið flutt? Ekki fyrir opnum tjöldum svo ég muni,“ segir Guðmundur sem segir þó að ákveðnar grunsemdir vakni.
„Er hér ráðandi í leynum einhvers konar öfgahægriflokkur sem hefur ákveðið með ólýðræðislegum bellibrögðum að hér skuli andúð á flóttafólki og ömurlegt skeytingarleysi um þjáningu annarra, ekki síst barna, vera leiðarstef í útlendingamálum? Hvaðan sprettur kappið, þessi þörf til að kaupa meira að segja sérstakan opinberan bíl með nýjustu græjum til að hafa uppi á hinum ólöglegu útlendingum? Svo er þessi skrjóður hafður á ferli hér um landið með fólki í einkennisbúningum, stoppandi saklausa vegfarendur á Miklubrautinni, beinandi þeim inn í bílinn til yfirheyrslna, eins og í einhverju lögregluríki sem enginn bað um, en virðist vera blautur draumur einhverrar klíku bak við tjöldin,“ segir hann.
Hann segir að hann viti ekki almennilega í hvers konar landi hann býr þegar kemur að þessum málum.
„Þessar aðferðir, þessi stefna, er eins og hönnuð af illskeyttustu þátttakendum kommentakerfanna. Myrkustu hugum þjóðarinnar. Látum flóttafólkið aðlagast. Hendum því svo út.“
Grein Guðmundar í heild sinni.