Guðmundur Franklín Jónsson forsetaframbjóðandi prýðir forsíðu Mannlífs í dag en eins og kunnugt er verður hann í framboði gegn Guðna Th. Jóhannessyni, sitjandi forseta, í forsetakosningunum sem fara fram eftir tæpan mánuð.
Í viðtalinu fer Guðmundur Franklín um víðan völl; hann tjáir sig meðal annars um uppvaxtarárin í Langholtshverfinu, gleðistundirnar í lífi sínu, muninn á honum og Guðna og gjaldþrot svo eitthvað sé nefnt. Þá opnar hann sig um erfiða minningu frá árinu 2001 þegar hann bjó og starfaði í New York.
Í viðtalinu í Mannlífi segir Guðmundur að hann hafi misst góða vini í árásinni á World Trade Center þann 11. september 2001. Hann var staddur nærri turnunum þegar þeir hrundu.
„Það síðasta sem þú heyrir áður en drunurnar í hrynjandi byggingunni bergmála á milli þröngra gatnanna eru öskrin í fólkinu sem reynir í örvæntingu að komast í burtu. Að horfa á háhýsi hrynja fyrir framan augun á þér þar sem fjöldi fólks lætur lífið og góðir félagar þínir þarna inni er í einu orði sagt skelfilegt. Ég myndi ekki óska versta óvini mínum þess að upplifa slíkar hörmungar.“
Mannlíf í dag.