„Ég veit ekki hversu oft ég hefi nefnt Grænhöfðaeyjar sem ákjósanlegan stað til dvalar þegar of kalt verður í Paradís. Nú hefnist mér fyrir orð mín því eftir tap Grænhöfðaeyja gegn Íslendingum í handbolta í gær svöruðu Grænhöfðingjar með því að senda þennan fimbulkulda til okkar sem er slíkur að hann nálgast það kaldasta í fyrravetur,“ skrifar Anna Kristjánsdóttir íbúi á Tenerife í pistli sínum í dag.
„Samkvæmt veðurspánni í gær á hámarkshitinn í dag að vera aðeins 19°C og lágmarksnæturhitinn að fara niður í 14°C. Veðurfræðingarnir reyndu eitthvað að gæta ráð sitt nú í morgunsárið, en ein eða tvær gráður eru samt innan skekkjumarka. Að sjálfsögðu munu svokallaðir Selfossmælar sýna mun hærra hitastig, en það eru Selfossgráður,“ heldur Anna áfram.
„Annars veit ég ekki hvort ég sé að gera Selfyssingum einhvern óleik, því maðurinn sem byrjaði með Selfossgráðurnar reyndist vera frá Akureyri. Hann hefur reyndar dvalið hér að undanförnu, en ég hefi enn ekki náð að hitta hann því miður, en mér skilst að hann sé með skemmtilegri Akureyringum, enda brottfluttur suður. Annar ágætur vinur minn á Facebook kvartaði yfir orðum mínum um kuldann á Stóra hundi í gærkvöldi, en þegar ég fór að skoða Facebooksíðuna hans, reyndist hann líka vera frá Akureyri, en að auki búsettur nyrðra. Eru virkilega allir Akureyringar svona lýgnir? Getur það virkilega verið að þeir haldi að Facebooksíðan "Geggjað veður á Akureyri" sé heilagur sannleikur? Vita þeir virkilega ekki að ég er með einkaleyfi á lygum á Facebook?“ Spyr Anna.
„Að þessu sinni verð ég að játa að íbúarnir á Stóra hundi, þið vitið, litlu eyjunni með stóra nafnið hér austur af Tenerife munu eiga vinninginn í dag hvað hitastig varðar, því þar er spáð heilli gráðu hlýrra veðri en í Paradís, en þeir eru líka nær Saharaeyðimörkinni en við. Íbúarnir á Stóra hundi eiga reyndar annan vinning einnig sem er sá að útsýnið til vesturs er mun fegurra en útsýnið okkar til austurs svo öllu sé haldið til haga.
Um daginn setti ég inn gamla mynd af mér og Stóra hundi, en Texas el Perró er sagður af ættinni Canarian Podengo, en það er einmitt eftir slíkum hundum sem Stóri hundur dregur nafn sitt sem og Hundaeyjar allar, en kanarífuglar heita eftir Kanaríeyjum en ekki öfugt,“ skrifar Anna að lokum.