Það er ekki tekið út með sældinni að vera í framboði til þings og segir Glúmur Baldvinsson, frambjóðandi Frjálslynda íhaldsflokksins, frá miður skemmtilegri reynslu sinni á Facebook.
Glúmi var boðið í kappræður flokksleiðtoga á Stöð 2 á fimmtudaginn og réðst af þeim sökum í undirbúningsvinnu.
„Svo ég fór í klippingu í dag og lét sverta á mér skeggið og fékk mömmu til að velja á mig föt og þjálfa mig í kurteisi. Það tók langan tíma enda óvanur maður í kurteisi,“ segir Glúmur.
Þegar hann hafi svo náð tökum á kurteisi og lofað að mæta ekki undir áhrifum fékk hann þau skilaboð frá Stöð 2 að hann ætti ekki að mæta.
„Fæ ekki að vera með. Þar með er öll þjálfunin fyrir bí og skemmtanagildi þáttarins ónýtt. En lifi lýðræði hinna leiðinlegu og loforðaflóðið og bara good luck. Til hamingju Ísland. Ég sem var farinn að drepast úr kurteisi.“
Í ummælum við færsluna er Glúmur spurður hvernig stóð á afbókuninni og segir hann ástæðuna slæmt gengi flokksins í skoðanakönnun Maskínu.