Gísli Marteinn Baldursson, þáttastjórnandi á RÚV og fyrrverandi borgarfulltrúi Sjálfstæðisflokksins, fór mikinn á Twitter í gær í umræðum um samgöngumál.
Gísli endurbirtir þar tíst Jóns Kaldal, talsmanns Íslenska náttúruverndarsjóðsins og fyrrum ritstjóra Fréttatímans, þar sem hann segist vilja flugvöllinn burt úr Vatnsmýrinni. Gísli grípur boltann á lofti, lofar færslu Jóns og hvetur til þess að Keflavíkurflugvöllur taki við innanlandsflugumferð þangað til ríkið finni nýja lausn fyrir innanlandsflugvöll.
Hann segir að íbúabyggð í Vatnsmýrinni sé umhverfisvænasta framkvæmd sem borgin geti ráðist í. Þá vill Gísli láta leggja lest frá Keflavík til Reykjavíkur í ofanálag, enda sé það græn og hagkvæm framkvæmd.
Heitar umræður sköpuðust undir færslu Gísla og var hann sakaður um landsbyggðarfordóma af nokkrum notendum Twitter. „Sönn orð einhvers sem hefur ekki búið á landsbyggðinni og þekkir ekki til tilfella þar sem staðsetning flugvallar hefur bjargað lífi. Við þurfum betri lausn en KEF flugvöll,“ segir Hólmfríður nokkur sem virðist ekki seld á hugmynd Gísla.
Henni svarar Sveinn Þórhallsson, sjálftitlaður áhugamaður um samgöngur og borgarskipulag. „Málið er að það er stöðugt einblínt á þessar mínútur frá flugvelli á sjúkrahús en ekki neinar aðrar í öllu ferlinu sem sjúkraflug er. Heildartímann má alveg skera niður þó svo að akkúrat tíminn frá flugvelli á sjúkrahús lengist, t.d. frá Kef niður á Sjúkrahús Keflavíkur,“ segir Sveinn.
Hólmfríður stóð ekki á svörum: „Og hvernig er það sem á að stytta flugtímann? Fyrir utan það að ef við getum grætt mínútur þar viljum við ekki henda þeim með því að lengja tímann frá flugvelli. Ef einhver er illa slasaður á Borgarfirði eystra til dæmis, þarf að koma viðk. Á FSN (1 klst 45 mín á góðum degi).“
Hún heldur áfram: „Þar er viðk. Metinn svo að þurfi suður, þá þarf oftast með aðillan í Egilsstaði (aðrar 45 mín á góðum degi) og svo í flug á sjúlrahús, það er ekki hægt að selja mér þá hugmynd að ef hæt er að stytta þetta einhvernvegin eigi ekki að gera það,“ segir Hólmfríður og bætir við: „Ef viðk. Er ekki bjargað á fjórðungssjúkrahúsinu í Neskaupstað, þarf viðk. Nánast í öllum tilfellum að komast á landsspítalann (lands-íslands, alls íslands, ekki bara sumra).“
Sveinn svarar og bendir á að bílaumferð kosti einnig mannslíf. „Þú styttir ekki flugtímann sjálfan, en það er t.d. hægt að fækka þeim tilfellum sem fljúga þarf með eflingu þjónustu í heimabyggð og stytta viðbragðstímann með því að hafa fleiri en eina sjúkraflugvél á einum stað á landinu. Aukin umferð kostar líka mannslíf og heilsu.“
Hann segir að málið sé ekki svo einfalt eins og það sé látið líta út fyrir. „Það er nefnilega ekki allt gert til að stytta þennan tíma og fólk er rosalega upptekið af akkúrat þessum síðustu mínútum. Það hlýtur að vera hægt að besta þetta öðruvísi en með því að gera nákvæmlega ekkert, sem kostar helling í peningum, lífi og heilsu,“ segir Sveinn, áhugamaður um samgöngur og borgarskipulag.
Annar Twitter-notandi leggur orð í belg varðandi sjúkraflug og segir „hvað með sjúkraflug fyrir landsbyggðina? finnst eins og að það ætti að vera heilsteypt plan til staðar hvað það varðar soldið langt að keyra frá KEF í Fossvoginn.“
Ein vill ekkert með það hafa að flytja flugvöllinn og segir „Eins og þú ert góður í vikan þá ertu ekki að hugsa rökrétt samband við Flugvöllinn hann verður að fá að vera í friði þar sem hann er.“ Ljóst er að þetta hitamál er hvergi nærri horfið úr þjóðfélagsumræðunni.
