„Ég labbaði að Hlemmi og aftur til baka heim og ég fann fyrir sárindum í öndunarvegi þó ég sé ekki með astma eða neitt slíkt,“ segir Gísli Marteinn Baldursson, sjónvarpsmaður og fyrrverandi borgarfulltrúi, í viðtali í Fréttablaðinu í dag.
Styrkur svifryks á höfuðborgarsvæðinu var mjög hár í gær sem má að líkindum rekja að stóru leyti til bíla sem ekið er um götur borgarinnar á nagladekkjum. Enginn snjór er á höfuðborgarsvæðinu en samt sem áður eru margir komnir á nagladekk, enda þau leyfileg á þessum árstíma.
Svava S. Steinarsdóttir hjá Heilbrigðiseftirliti Reykjavíkur segir við Fréttablaðið að í gær hafi í fyrsta skipti verið umferðartengd mengun. Búast má við áframhaldandi svifryksmengun í dag enda úrkomulaust og mjög stillt veður í kortunum.
Gísli Marteinn er mikill talsmaður annarra samgangna en einkabílsins og bendir hann á að engin þörf sé að vera á nagladekkjum miðað við núverandi aðstæður á höfuðborgarsvæðinu.
Hann segir að erlendar rannsóknir bendi til þess að þeir sem búa nálægt svifryksgötum séu í meiri hættu á að fá Alzheimer.
„Mér finnst ekkert að því að banna nagladekk. Ef Reykjavík bannar slík dekk þá er ekkert mál að innleiða einhvers konar kerfi enda fáar borgir sem leyfa nagladekk. Þannig að fólki af landsbyggðinni væri kleift að aka inn í borgina án þess að fá sekt. Tregðan yrði að banna nagladekk yfir allt Ísland. Tíðarfarið hefur breyst og dekkin eru orðin betri og mér finnst engin ástæða til að vera á nagladekkjum. Reykjavíkurborg gæti til dæmis byrjað að banna nagladekk í miðborginni. Það gæti verið gott fyrsta skref, þó gjaldtaka á slík dekk sé augljóst fyrsta skref. Svona getur þetta ekki gengið.“