„Að mínu mati er ekkert óeðlilegt við það að fjölmennasta sveitarfélag landsins sem ekki er borg, hýsi eins og einn öflugan háskóla,“ segir Friðrik Sigurðsson, formaður Viðreisnar í Kópavogi.
Friðrik skrifar grein á vef Vísis þar sem hann kallar eftir því að bæjarstjórn Kópavogs beiti sér í málinu og skólanum verði fundinn nýr staður í Kópavogi.
Á dögunum var greint frá því að Framkvæmdasýsla ríkisins hefði gert frumathugun á ákjósanlegasta staðnum fyrir framtíðarhúsnæði Listaháskólans. Er Vatnsmýri talin ákjósanlegasta staðsetningin.
Listaháskólinn hefur glímt við húsnæðisvanda lengi og er starfsemi hans nú í fjórum húsum í tveimur póstnúmerum. Enn á eftir að tryggja fjármögnun verkefnisins en búið er að tryggja fjármagn í samkeppni og útboð.
Friðrik segir að vinnubrögð Framkvæmdasýslunnar beri ekki með sér víðsýni.
„Í ljós kom að hjá þeim reyndust aðeins tveir valkostir kannaðir, að byggja við SS húsið i Laugarnesi eða byggja í Vatnsmýrinni. Ekki bera þau vinnubrögð með sér að víðsýni hafi ríkt við könnunarvinnuna,“ segir Friðrik sem segir ekkert óeðlilegt við það að horfa til Kópavogs varðandi staðsetningu. Þannig er Kópavogur eitt fjölmennasta sveitarfélag landsins.
„Ég tel að Kársnesið í Kópavogi sé tilvalinn staður fyrir nýtt heimili háskólanáms í listum. Á Kársnesinu eru stórar lóðir sem nýtast vel í þetta hlutverk og aðgengi að skólanum verður frábært með Borgarlínu og nýrri brú yfir Fossvoginn,“ segir Friðrik sem endar grein sína á þessum orðum:
„Ég hvet bæjarstjórn Kópavogs til að fylgja málinu eftir og skora á ríkisvaldið til að sjá út fyrir 101 & 102 og telja upp í 200….Kópavogur!“