Afar fjörugar og áhugaverðar umræður fara nú fram á í Facebook-hópnum Travel Iceland þar sem erlendir ferðamenn nefna mestu vonbrigðin við Ísland. Þetta kemur fram í frétt Fréttablaðsins.
Ísland hefur verið í hópi heitustu áfangastaða Evrópu undanfarin ár og hafa milljónir ferðamanna komið hingað til lands á undanförnum árum. Það skal strax tekið fram að yfirgnæfandi meirihluti þeirra sem leggja orð í belg í þræðinum virðast hafa verið mjög ánægðir með Íslandsheimsóknina og þurfa jafnvel að grafa djúpt eftir því að finna eitthvað neikvætt.
Nokkrir segja meira að segja að mestu vonbrigðin hafi verið að yfirgefa landið og því hafi þeir ákveðið að setjast hér að. Ekki slæm meðmæli það.
Fréttablaðið tók saman að gamni nokkrar athugasemdir í þræðinum.
„Veðrið var það sem pirraði mig mest. Ég var þarna í 22 daga og í hreinskilni sagt þá var veðrið ágætt í fimm daga. Dagskráin frá degi til dags var skipulögð með tilliti til veðurs,“ segir portúgalskur karlmaður sem kom hingað til lands í haust.
Annar ferðamaður tekur í svipaðan streng. Hann var hér á landi fyrr í sumar og svo aftur núna í haust.
„Ég upplifði nánast það nákvæmlega sama. Ég var hér í 22 daga í júní til júlí og það rigndi nánast allan tímann. Það var eins og rigningarský elti okkur allan tímann. Við erum núna að klára aðra 23 daga ferð og veðrið hefur heilt yfir verið frábært. Maður veit aldrei hvernig veður maður fær.“
Fleiri nefna veðrið, til dæmis kona sem kom yfir sumartímann og dvaldi í þrjár vikur.
„Ég bjóst ekki við því að veðrið yrði frábært en við sáum sólina þrisvar á 23 dögum. Einn daginn var fjögurra stiga hiti.“
Vont kaffi og fá salerni
Fólk nefnir svo ýmis önnur atriði.
„Það var MJÖG erfitt að finna glútenfrían mat,“ segir bandarísk kona sem kom hingað til lands.
„Kaffið, það var mjög vont alls staðar,“ segir mexíkóskur karlmaður. Aðrir eru þó ekki sammála þessari fullyrðingu. „Mér fannst kaffið frábært og það besta var hvað það var heitt. Hérna í Bandaríkjunum er kaffið oftar en ekki hlandvolgt,“ segir einn.
„Löng ferðalög um óbyggðir án þess að komast nokkurs staðar á salerni. Að öðru leyti frábært,“ segir einn Bandaríkjamaður.
„Það var mjög dýrt að fara út að borða. Það var í rauninni líka dýrt að borða heima,“ segir breskur karlmaður sem kom hingað til lands sem ferðamaður.
Óvenjulegt vandamál
Annar segist hafa orðið fyrir vonbrigðum þegar hann sat fastur í umferðinni af óvenjulegri ástæðu. „Við sáum föst á þjóðvegi í klukkutíma þar sem nokkur hundruð kindur lokuðu veginum. Það var verið að smala en það var ekkert sem gaf til kynna að vegum yrði lokað vegna þess.“
Fólk nefnir svo fleiri atriði, til dæmis lélegt vöruúrval í matvöruverslunum, glæfralegt aksturslag fólks, veggjakrot á byggingum í Reykjavík og mikinn fjölda ferðamanna.
Svo eru þeir sem finna ekkert neikvætt við landið. „Ég var ekki fúl með neitt. Ég get ekki sagt það um neinn annan áfangastað og ég hef ferðast mikið.“
