Felix Bergsson mun taka ákvarðanir um Eurovision á næsta ári. Hann er kominn í stýrihóp keppninnar sem tekur allar helstu ákvarðanir um keppnina og tryggir að skiptin frá Hollandi til Ítalíu gangi klakklaust fyrir sig. Felix tekur sæti í hópnum í tvö ár, að því er fram kemur í Fréttablaðinu í dag.
Hópurinn hittist í fyrsta sinn í Genf í vikunni og sagði Simona Martorelli, fararstjóri ítalska hópsins og meðlimur í stýrihópnum, í samtali við heimasíðu Eurovision, að eftirvæntingin væri mikil fyrir komu keppninnar. Fyrsta verk er að finna borg á Ítalíu til að halda keppnina.
Felix fór í örlitla kosningabaráttu fyrir kjörið en þrír fararstjórar eru kosnir í hópinn og er kjörtímabilið tvö ár. Felix hefur undanfarin ár verið fararstjóri íslenska hópsins og er þakklátur stuðningi RÚV.
„Það er gaman að vera með í því að þróa keppnina áfram næstu tvö árin hið minnsta og það er ýmislegt á bak við tjöldin og í skipulagi þar sem þarf að taka til hendinni. Mér finnst gaman að koma að þessu enda er bjart yfir Eurovision.Ég held að allir séu sammála um að síðasta keppni í Rotterdam hafi verið frábær. Samfélagsmiðlanotkunin var nánast gígantísk og það er greinilegt að listamenn eins og Daði og í Mánaskin höfðuðu til unga fólksins, 16–23 ára,“ hefur Fréttablaðið eftir Felix.
Hann vill hinsvegar ekkert gefa upp um það hvaða hugmyndir hann er með sem geta gert keppnina betri. „Það kemur í ljós en fyrst og fremst er þetta samstarfsverkefni milli allra í hópnum. Það er gaman að sitja við borðið og koma að þessu. Allar breytingar sem á að gera koma inn á okkar borð og þær eru ræddar og svo ákvörðun tekin.
Nú er verkefnið að styðja Ítalíu til að halda flotta keppni. Þeir eru með fjármagnið en þeir þurfa stuðning til að halda flotta keppni. Það þarf að tryggja að fólk fari ekki af sporinu,“ segir Felix.
