„22 ára gömul fékk ég þessi skilaboð frá þjálfara í deildinni,“ segir körfuboltakonan Fanney Lind Thomas sem birti á Twitter-síðu sinni í gær skilaboð sem hún fékk frá kvæntum karlkyns körfuboltaþjálfara.
Eins og greint var frá í gær mun körfuboltadómarinn og skólastjórinn Leifur S. Garðarsson ekki dæma aftur fyrir KKÍ eftir að hafa sent óviðeigandi skilaboð til leikmanns í meistaraflokki kvenna. Leifur er skólastjóri í Áslandsskóla í Hafnarfirði og hefur einnig getið sér góðs orðs sem knattspyrnuþjálfari.
Eins og sést á færslu Fanneyjar hér að neðan sendi ónefndur þjálfari í deildinni henni nokkur óviðeigandi skilaboð. Er tilefni færslunnar væntanlega mál Leifs, en tekið skal fram að hann er þessum skilaboðum óviðkomandi.
Í skilaboðunum sem Fanney birtir er meðal annars að finna eitthvað sem á trúlega að vera klámfenginn brandari. Af myndinni að dæma bárust skilaboðin árið 2012.
„Mjög svo óviðeigandi frá rígfullorðnum giftum manni. Slík hegðun fjölmargra þjálfara sem ég veit um gagnvart ungum stúlkum í deildinni hefur liðist í öll þessi ár,“ sagði Fanney á Twitter-síðu sinni en færsla hennar vakti talsverða athygli.
22 ára gömul fékk ég þessi skilaboð frá þjálfara í deildinni. Mjög svo óviðeigandi frá rígfullorðnum giftum manni. Slík hegðun fjölmargra þjálfara sem ég veit um gagnvart ungum stúlkum í deildinni hefur liðist í öll þessi ár. #timeisup pic.twitter.com/btCeGCPzN8
— Fanney Lind Thomas (@FanneyL) January 27, 2021