„Sorpanos, sögðu þeir í auglýsingum Sorpu. Það þótti sniðugt. Núna er enginn að hlæja,“ segir Eyþór Arnalds, oddviti Sjálfstæðisflokksins í borgarstjórn, í aðsendri grein í Fréttablaðinu í dag.
Þar skrifar Eyþór um málefni Sorpu og segir hann félagið, eitt af dótturfélögum borgarinnar, vera í rusli. „Flokkun hefur verið minni í Reykjavík en víða annars staðar á landinu. Urðun meiri en í Evrópu. Nú á að hætta að urða sorp um næstu áramót. Þess í stað er verið að byggja gas- og jarðgerðarstöðina Gaja. Hún virðist hafa gengið sjálfala,“ segir hann.
Eyþór segir að kostnaðurinn við byggingu hennar hafi farið fram úr öllum áætlunum og stefni í sex milljarða króna, rúmlega tólf bragga.
„Að óbreyttu verður reikningurinn sendur á heimilin í formi gjaldskrárhækkana. Á þessu ári hefur Sorpa tekið tvö neyðarlán upp á eitt þúsund og fimm hundruð milljónir króna en fyrirtækið stendur mjög illa fjárhagslega.“
Eyþór segir að ekki sé nóg með að reikningurinn sé sendur á skattgreiðendur heldur hafi borgin veðsett útsvarstekjur borgarinnar svo Sorpa geti tekið lán fyrir framúrkeyrslunni.
„Framúrkeyrslan virðist hafa komið eigendunum á óvart. Aðaleigandi er Reykjavíkurborg, sem hefur staðið að því að farið var í verkefnið. Borgarstjóri sjálfur tók ákvarðanir á formlegum eigendavettvangi Sorpu en hann fer með 60% allra hluta í félaginu. Þegar verksmiðjan er tilbúin á hún að framleiða metangas og moltu. Þrátt fyrir ítrekaðar beiðnir hefur engin rekstraráætlun fundist. Engir samningar eru um sölu á metangasinu og er markaður fyrir það lítill. Þetta þarf að leysa.“
Eyþór segir að moltan sé sér kapítuli út af fyrir sig og ekki sé víst að hún gangi út. Ef hún gerir það ekki verður hún uppsafnaður vandi.
„Tæknilausnirnar í gasgerðarstöðinni eru umdeildar og því óvíst að allt virki. Það á einfaldlega eftir að koma í ljós. Ekki er sopið kálið þó í ausuna sé komið. Og sorpið ekki farið þó væntingar hafi verið um það. Sorpanos, sögðu þeir í auglýsingum Sorpu. Það þótti sniðugt. Núna er enginn að hlæja,“ segir Eyþór að lokum.
