Sjónvarpskokkurinn Eva Laufey Kjaran Hermannsdóttir er ein af mörgum landsmönnum sem hafa lent í tjóni vegna þess hversu illa gekk að hreinsa göturnar í vetur.
„Ég bara lenti í svona holu, einni af mörgum á veginum á leiðinni upp á Akranes þar sem ég bý,“ sagði Eva í samtali við Fréttablaðið í mars. „Það fóru tvö dekk og það er núna verið að skoða bílinn sem fór í viðgerð.“
Eva leitaðist eftir því að fá tjón sitt bætt í kjölfarið en núna fyrst í maí bárust svör um að hún þurfi að bera það sjálf.
„Ég trúi ekki að ég sé að röfla enn eina ferðina yfir þessum blessuðum vegum okkar en jæja. Í dag fékk ég þau skilaboð frá Vegagerðinni að ég fæ ekki tjón bætt vegna þess að ég var sú fyrsta að tilkynna stórhættulegar holur á veginum á Kjalarnesi,“ skrifar Eva á Facebook.
„Það voru margir bílar sem lentu illa í þessum holum og heppin þau að ég hafi verið sú fyrsta að tilkynna. Þetta virkar sem sagt þannig að sá fyrsti sem hringir og tilkynnir fær ekki tjónið bætt en hinir fá bætt. Geggjuð regla og hvetur okkur heldur betur til þess að tilkynna hættulega vegi,“ bætir hún við og deilir frétt Fréttablaðsins frá því í mars.
„Þessi frétt var skrifuð í mars þegar óhappið átti sér stað og ég var að fá svar núna í lok maí varðandi tjónið,“ skrifar Eva sem er ekki sátt með niðurstöðuna.
