„Ef einhvern tímann er þörf fyrir að standa með börnum, þá er það núna,“ segir Erna Reynisdóttir, framkvæmdastjóri Barnaheilla – Save the Children á Íslandi, í grein á Vísi.
Þar sendir hún Áslaugu Örnu Sigurbjörnsdóttur dómsmálaráðherra skýr skilaboð, en tilefnið er Twitter-færsla Áslaugar á dögunum þar sem hún sagði að ef einhverntímann væri þörf á netverslun með áfengi væri það núna.
Erna segir að í ljósi þessa vilja Barnaheill árétta eftirfarandi:
„Ef einhvern tímann er EKKI þörf fyrir..
-aukna hættu á heimilisofbeldi
-aukna hættu á ofbeldi gegn börnum
-aukna hættu á að börn búi við vanrækslu
-hættu á auknum kvíða barna og andlegum áföllum
... þá er það núna.“
Í grein sinni segir Erna að Barnaheill hafi ekki aðeins áhyggjur af aðgengi barna og ungmenna að áfengi, heldur ekki síður af auknu aðgengi foreldra að áfengi.
„Aukið aðgengi að áfengi leiðir til aukinnar neyslu þess, eins og fram kom í síðasta bréfi Barnaheilla til þín. Rannsóknir sýna að aukin áfengisneysla foreldra hefur neikvæð áhrif á börn.“
Þá bendir Erna á að áfengisneysla slævi huga og dómgreind fólks. „Áfengisneysla þeirra foreldra sem nú þegar stunda hana stjórnlaust færist meira inn á heimilin sökum samkomubanns. Það ástand eykur álag á börn umtalsvert og kvíði þeirra eykst við að sjá foreldra sína í annarlegu ástandi. Með þessu er ekki verið að segja að enginn geti haft áfengi um hönd. En áfengi á ekki að hafa um hönd í kringum og innan um börn,“ segir hún.
Í ljósi meðal annars þessa skora Barnaheill á Áslaugu Örnu að bæta ekki á vanda barna sem búa við óöruggar uppeldisaðstæður með því að auka aðgengi enn frekar að áfengi en nú er orðið.
„Börn geta ekki valið sér heimilisaðstæður og það búa ekki öll börn við heimilisfrið. Börn eiga hins vegar rétt á vernd gegn ofbeldi og vanrækslu, án mismununar. Stjórnvöld þurfa því að tryggja sérstaklega vernd barna í óviðunandi aðstæðum gegn aukinni áfengisneyslu, vegna hinna neikvæðu afleiðinga sem af henni hljótast.“
Erna segir að nú sé brýnt að við sem samfélag finnum allar þær jákvæðu leiðir sem fyrirfinnast til að vinna saman á þessum tímum og aðstoða samfélagið í gegnum erfiða stöðu vegna Covid-19.
„Ef einhvern tímann er þörf fyrir að standa með börnum, þá er það núna. Barnaheill hafa Barnasáttmálann að leiðarljósi í öllu sínu starfi og leggja sérstaka áherslu á vernd gegn ofbeldi og vanrækslu.“