„Suma daga er ég full af orku og adrenalíni, aðra uppgefin og þess á milli rokka ég á milli þess að vera reið, jafnvel hrædd eða ólýsanlega sorgmædd,“ segir Erna Kojic, smitsjúkdómalæknir á Mount Sinai-sjúkrahúsinu í New York.
Erna er í viðtali við Læknablaðið um stöðu mála en eins og kunnugt er eru Bandaríkin það land sem hefur farið verst út úr COVID-19 faraldrinum til þessa. Tala látinna þar er komin í 100 þúsund, þar af rúmlega 23 þúsund í New York-ríki.
„Það er gífurlega erfitt að ræða við aðstandendur þeirra sem eru í dánarferlinu vegna þess að ólíkt því sem áður var, geta þeirra nánustu ekki verið við dánarbeðinn. Oft aldraðir sem hafa búið saman í áratugi er síðan stíað í sundur af veirunni á lokastund,“ segir Erna í viðtalinu sem bendir á að hún sinni einungis veikustu COVID-sjúklingunum.
Erna segir að forsvarsmenn sjúkrahússins hafi brugðist vel við faraldrinum og þurft að taka ákvarðanir hratt.
„Heilbrigðisyfirvöld tengd stjórnvöldum er auðvitað allt annað mál. Ég þarf ekki að útlista hversu mikið áhyggjuefni það er að vera með forseta sem talar tóma þvælu þegar kemur að heilbrigðismálum. Þrátt fyrir að hafa góðan ráðgjafa í Tony Fauci, hlustar hann ekki. Stjórnendur New York- fylkis og borgarinnar hafa staðið sig mjög vel, þá sérstaklega Cuomo,“ segir Erna sem á von á því að lífið breytist nokkuð þegar faraldurinn verður yfirstaðinn.
„Ég held að faraldurinn muni breyta mjög miklu. Handabönd verða ekki lengur til. Mikið af vinnu á göngudeildum mun sennilega breytast yfir í fjarskipti þar sem við komum til með að meta sjúklingana í gegnum tölvur,“ segir hún og bætir við:
„Stærra vandamál bíður okkar eftir allt þetta því það er afar líklegt að við taki fjárhagsleg kreppa. Margir munu eiga afar erfitt með að fá vinnu og svo framvegis. COVID-19 hefur líka kennt okkur að það sem við áður töldum vera lífsnauðsynjar, eru það ekki lengur. Hreint vatn og sápa hefur toppað alls konar óþarfa sem við keyptum hér áður fyrr.“
