Elísabet Reynisdóttir næringarfræðingur mætti í Bítið á Bylgjunni í morgun og ræddi tískudrykkinn Prime, sem hefur undanfarið slegið í gegn hjá yngri Íslendingum. Drykkurinn inniheldur 900 míkrógrömm af A-vítamíni, sem er ráðlagður dagskammtur fyrir fullorðna, en of mikið A-vítamín getur valdið alvarlegum eitrunaráhrifum. Elísabet segir að foreldrar eigi að vara börnin sín við neyslu drykkjarins.
Prime er einn vinsælasti orkudrykkur heims um þessar mundir, en vinsældirnar má rekja til samfélagsmiðla. Internetpersónuleikarnir KSI og Logan Paul eru framleiðendur drykkjarins. Langar raðir mynduðust í verslunum þegar nýjar sendingar af Prime komu í verslanir og var drykkurinn oft á tíðum uppseldur á landinu. Vinsældirnar urðu það miklar að tómar dósir voru orðnar vinsæl söluvara.
Elísabet sagði að drykkurinn sé hlaðinn að efnum sem væru skaðleg í of miklu magni. Að hennar sögn er drykkurinn vel markaðssett drasl.
„Þessi markaðssetning er snilld. Ég skemmti mér mjög vel í gær að skoða þetta og ég hugsaði að þeir eiga að fá verðlaun fyrir geggjaða markaðssetningu. Það er það sem þessi drykkur er, geggjuð markaðssetning,“ sagði Elísabet, og hélt áfram:
„Næringarlega seð er hann algjört drasl. Það sem er alvarlegt þarna er sítrónusýra sem getur valdið skaða í slímhúðinni. Börn með astma er í hættu, börn með ristilvandamál eru í hættu. Við gleymum að horfa á aðrar innihaldslýsingar sem geta skaðað börnin,“ sagði Elísabet.
Elísabet sagði að hún geti huggað sig við að sjá amínósýrur meðal innihaldsefna, en þau hafa jákvæð áhrif á taugaboðefnin. Það eru vítamínin sem eru ekkert sérstök að hennar sögn.
„Ég skil ekki eiginlega hvað þau eru að gera í þessum drykk.“
Elísabet vill að börn fái betri fræðslu um orkudrykki og markaðssetningu.
„Það er rosalega skrítið hvernig þetta er hæpað, auglýsingin nær til barnanna. Mér finnst skrýtið að þetta sé aldrei gripið inn í. Af hverju kennum við ekki börnum hvernig markaðssetning virkar. Það er verið að fífla ykkur,“ sagði Elísabet.
„Ef þið viljið varna því að börnin ykkar fái auka slímhúð upp á astma, upp á meltingarsjúkdóma, þá myndi ég sleppa þessum drykk, því sítrónusýran er í miklu magni þarna. Það er það sem ég horfi á,“ sagði Elísabet.