Benedikt Jóhannesson, stofnandi Viðreisnar, segir Donald Trump Bandaríkjaforseta ganga lengra en margir óttuðust í upphafi þegar hann var kosinn.
„Forseti Bandaríkjanna lætur hermenn ryðja burt friðsömum mótmælendum til þess að hægt sé að taka mynd af honum með biblíu í hendi. Svipmyndin er svo heimskuleg að Hollywood léti sér ekki detta svona þvæla í hug,“ skrifar Benedikt . í grein í Morgunblaðinu í dag.
Hann segir að þrátt fyrir að margir hafi óttast í upphafi að Trump gæti gert skelfilega hlut voru aðrir vissir um að Bandaríkin hefðu næga öryggisventla.
„Reynslan sýnir þvert á móti að Trump gengur sífellt lengra, hótar andstæðingum, rekur þá sem eiga að gæta þess að reglum sé fylgt og hefur þær að engu. Hann dregur Bandaríkin út úr alþjóðasamvinnu, reisir múra, berst markvisst gegn viðskiptum þjóða á milli og býr til ímyndaða óvini eins og djúpríkið .“
Benedikt segir ógnaröflin færa sig upp á skafið meðan enginn sér við þeim. „New York Times líkti nasistum Hitlers við skátaflokk árið 1928. Þá fengu þeir 2% atkvæða í kosningum. Fimm árum seinna varð Hitler kanslari eftir kosningasigur nasista. Hann herti hratt tökin og skapaði samfélag ótta og einangrunar. Í nóvember 1933 kusu 94% þjóðarinnar nasista. Margir kjósendur nýttu sér þau „þægindi“ að greiða atkvæði án þess að fara inn í kjörklefann. Sú saga komst á kreik að atkvæðaseðlarnir væru leynilega merktir og ráðamenn ýttu undir slíkar vangaveltur.“
Benedikt segir Þýskaland ekki hafa verið vanþróað land óupplýst fólks og illmenna upp úr 1930 fremur en Bandaríkin árið 2016 en að heiðvirt fólk hafi bara ekki brugðist við hættunni meðan það var hægt.
„Á Íslandi hæðist ákveðinn hópur manna að „góða fólkinu“, jafnvel menn sem áður nutu álits.“
Í lokin vitnar Benedikt í Þórarinn Eldjárn sem orti:
Veðrið er fínt, það er fallegt á Bakka
og fasisminn ríður í hlað.
Velgreiddur maður í vönduðum jakka,
í vasanum morgunblað.
„Bakkabræður taka gestinum vel. Í lok kvæðisins vill hann gista. Hverju svörum við þá?“
