Davíð Helgason, einn af stofnendum Unity Technologies, hefur fest kaup á einu glæsilegasta einbýlishúsi landsins, fasteignina við Hrólfsskálavör 2.
Markaðurinn greinir frá þessu í dag.
Húsið sem um ræðir var áður í eigu Skúla Mogensen, stofnanda og forstjóra WOW air, en í september á þessu ári eignaðist Arion banki það. Húsið er 630 fermetrar að stærð og á þremur hæðum. Í því er meðal annars að finna fjölskylduherbergi, gufu og líkamsræktaraðstöðu. Þá eru tveir heitir pottar fyrir utan.
Heimildir Markaðarins herma að Davíð hafi greitt á sjötta hundrað milljónir króna fyrir húsið.
Davíð er sem fyrr segir einn af stofnendum Unity Technologies en markaðsvirði þess er nú 41,7 milljarður Bandaríkjadala. Í frétt Markaðarins kemur fram að Davíð sé einn af ríkustu núlifandi Íslendingunum og er eignarhlutur hans í félaginu metinn á rúma 200 milljarða króna.
Húsið við Hrólfsskálavör 2 var hannað af Steve Christer og Margréti Harðardóttur hjá Studio Granda. Gríma Björg Thorarensen, unnusta Skúla, og Selma Ágústsdóttir sáu um innanhússhönnun þess.
Myndir af þessu glæsilega húsi má sjá hér fyrir neðan.
