Atvinnulífið í kvöld: Framtakssjóður Íslands:
Þátturinn Atvinnulífið er á dagskrá Hringbrautar kl. 20.00 í kvöld. Þetta er síðasti þáttur á þessu hausti en ný þáttaröð hefst að öllum líkindum í febrúar n.k. Í þættinum verður saga og starfsemi Framtakssjóðs Íslands (FSÍ) rekin í máli og myndum.
Rætt verður við núverandi stjórnarformann og fyrrv. framkv.stjóra FSÍ ásamt þeim Ásgeiri Jónssyni seðlabankastjóra og Lilju Björk Einarsdóttur bankastjóra Landsbankans en bankinn kom að talsverðum viðskiptum við FSÍ árið 2011 með svokölluð Vestia-félög sem flest stóðu illa eftir fjármálahrunið en FSÍ tókst að rétta reksturinn af með innspýtingu og skipulagsbreytingum.
Dr. Ásgeir Jónsson var á sínum tíma dósent við Háskóla Íslands og var fenginn til að skrifa bók um starfsemi FSÍ sem ber nafnið Framtak við endurreisn. Í viðtali í þættinum lýsir Ásgeir aðkomu sinni að bókaskrifunum og því áliti sem hann hafði á FSÍ fyrir og eftir það verkefni. Einnig kemur Ásgeir inná málefni lífeyrissjóða og fjallar um breytingar á hagstjórn sem hann hefur boðað sem nýlega ráðinn seðlabankastjóri. Aðalviðmælandi er Þorkell Sigurlaugsson sem setið hefur í stjórn FSÍ frá upphafi, lengst af sem formaður stjórnar.
Þá lýsir Herdís Fjeldsted, fyrrv. framkvæmdastjóri hvernig starfsemin var upp byggð m.t. kaupa á fyrirtækjum og jafnframt fyrirhugaðir sölu þeirra þar sem ljóst var frá upphafi að sjóðurinn myndi aðeins starfa í 10 ár að hámarki. Starfsemi FSÍ er af mörgum talin vera einn mikilvægastii björgunarpakki í íslenskri viðskiptasögu og því fróðlegt að fá að hlusta á frásagnir þeirra málsmetandi aðila sem þáttastjórnandinn Sigurður K. Kolbeinsson ræðir við í þættinum. Kvikmyndataka og myndvinnsla var í höndum Friðþjófs Helgasonar.